Jan basyna qarjylandyrýdyń nátıjesi qandaı – BǴM jaýap berdi
NUR-SULTAN. QazAqparat - «Orta bilim salasyndaǵy memlekettik-jekeshelik áriptestik: jekemenshik mektepter» taqyrybynda ótken onlaın konferentsııada QR Bilim jáne ǵylym vıtse-mınıstri Bıbigúl Asylova jan basyna qarjylandyrýdyń nátıjesi týraly aıtty, dep habarlaıdy QazAqparat tilshisi.
«Búgingi tańdaǵy nátıje jaqsy. Biz bul jobany iske asyryp, Nur-Sultan, Almaty jáne Shymkent qalalaryna jan basyna qarjylandyrýdy engizdik. Onyń taǵy bir nátıjesi – jeke menshik mektepterge memlekettik bilim berý tapsyrysyn ornalastyrý boldy. Bul ádis orta bilim salasyndaǵy memlekettik-jeke menshik seriktestikke qatysty máselelerdi kóterýge sebep boldy. Byltyr 70 jańa mektep ashyldy. Bul degenimiz – 20 myń oqýshy qamtyldy degen sóz. Mundaı nátıje elimizde táýelsizdik alǵaly bolǵan joq», - deıdi QR Bilim jáne ǵylym vıtse-mınıstri Bıbigúl Asylova.
Onyń aıtýynsha, ár aımaqta oqýshylarǵa oryn jetispeý, úsh aýysymmen bilim berý – ózekti másele bolyp qalyp otyr.
«Biz mul máseleni uzaq ýaqyttan beri sheshýge talpynyp kelemiz. Bıznes, jeke seriktestiktiń qatysýynsyz bul máseleni sheshý qıyn ekenin túsinemiz. Jan basyna qarjylandyrý arqyly memleket kóp shyǵynnan arylady», - deıdi ol.
