Jan basyna qarjylandyrý: Mektepterde ata-anadan aqsha jınaý azaıdy ma
NUR-SULTAN QazAqparat – Nur-Sultan qalasy bilim basqarmasynyń basshysy Ánýar Janǵozın jan basyna qarjylandyrý júıesi elorda mektepterine bólingen qarjynyń tıimdi jumsalýyna qalaı áser etip jatqanyn aıtty, dep habarlaıdy QazAqparat tilshisi.
Jan basyna qarjylandyrý júıesi elordanyń 80 mektebine engizilgen bolatyn. Qalalyq bilim berý basqarmasynyń basshysy BAQ ókilderimen ótken brıfıgte sonyń nátıjelerimen bólisti.
«Mamandandyrylǵan jáne daryndy balalarǵa arnalǵan 5 bilim oshaǵynan basqa mektepterdiń bárine bul júıe engizilgen. Júıege kóshken mektepterde birden jaǵymdy ahýal baıqaldy. Eń bastysy, mektep basshylyǵy qarjyny naqty josparlaýǵa múmkindik aldy. Óıtkeni, joǵarydan qansha bóler eken dep kútip otyrmaı, oqýshy sanyna qaraı aldyn ala esepteı alady. Materıaldyq-tehnıkalyq jabdyqtaý máselesinde alǵa jyljý bar. Mektepterge 2000-nan astam kompıýter satyp alyndy. Tek kompıýterlik synyptar ǵana emes, muǵalimder de kompıýter tapshylyǵynan qutylyp jatyr. Bul saladaǵy ózekti máseleniń biri bolatyn. Budan bólek 36 zerthana júıesi alyndy. Barlyq mektepter 100 paıyz robot tehnıkasymen jabdyqtaldy. 300-den astam ınteraktıvti taqta ornatyldy. Osynyń bári jan basyna qarjylandyrýdyń arqasynda kelgen ıgilikter», - deıdi ol.
Basqarma basshysy aldaǵy ýaqytta mektep bıýdjetin josparlaýǵa qamqorshylyq keńester arqyly ata-analar da tartylatynyn aıtady.
«Ata-analarda bıýdjetti bólýge qatysatyn bolady. Jańa oqý jylynda 15 mektep basqarýdyń jańa qalybyna kóshedi. Buryn olar memlekettik mekeme bolsa, endi sharýashylyq júrgizýge quqyly kásiporynǵa aınalady. Osynyń arqasynda mektep shtattyq júkteme men eńbekaqy kólemin ózderi belgileıtin bolady. Odan keıin, bul mektepter jyldyq bıýdjetti ıgerý mindetinen bosatylady. ıAǵnı, bıyl bıýdjet tolyq ıgerilmeı qalsa, mektep qorynda qala beredi. Burynǵydaı ıgerilmegen aqshany qaıtarý degen másele bolmaıdy. Únemdelgen qarjyny jyldar boıy jınaqtap, kúrdeli jóndeý júrgize alady», - deıdi ol.
Basqarma basshysynyń aıtýynsha, soǵan qaramastan, ata-analardan aqsha jınaý boıynsha shaǵymdar tolastamaǵan.
«Barlyq shaǵymdar boıynsha komıssııa quryp tekserdik. Mundaı jaǵdaıdyń bárinde aqshany ata-analar komıteti jınaǵan bolyp shyǵady. Mektep ákimshiligi men synyp jetekshisi bul jaıttan habarymyz joq deıdi. Barlyq ata-ana mektep dırektorynyń tıisti buıryǵymen tanystym dep qol qoısa da, osyndaı jaǵdaılar oryn alǵan. Shartty túrde alsaq, aqsha jınaý túrli sharalar men syılyqqa dep jınalady. Ata-analar bir nárseni umytpaýy kerek. Muǵalimge dep jınaǵan syılyq onyń abyroıyna nuqsan keltiretin bolady», - dedi Ánýar Janǵozın.
