Jámishev devalvatsııaǵa qatysty boljam jasady
ASTANA. QazAqparat - Búgin Astanada ótken baspasóz máslıxatynda Qazaqstan damý bankiniń basshysy Bolat Jámishev teńge baǵamynyń qubylýyna baılanysty óz boljamyn jarııalady, dep xabarlaıdy QazAqparat tilshisi.
"Endi, biz boljam jasaýmen aınalyspaımyz. Degenmen, qarjy naryǵyn únemi baqylap otyramyz. Qazirgi dınamıkaǵa áser etip otyratyn faktorlardy da zerdeleımiz. Aldaǵy ýaqytta aıyrbastaý kýrsy kúrt ózgerip ketedi dep oılamaımyz. Búginde ulttyq valıýta kúsheıip keledi. Bálkim, ol keri serpiledi, devalvatsııanyń belgili bir kezeńi bolady. Soǵan qaramastan, ol úderisterdiń astarynda qandaı da bir "mına" bar dep oılamaımyn. Qazirgi dınamıkaǵa qaýip tónip turmaǵan tárizdi", - dedi Jámishev.
Onyń aıtýynsha, Qazaqstannyń damý banki óziniń qarjylyq saıasatyn qaıta qarastyryp, zaımdardy sheteldik valıýtada emes, ulttyq valıýtamen berýge basymdyq jasaıdy. Osy oraıda eksportqa shyǵa alatyn, sondaı-aq valıýtalyq qaýip-qaterlerdi eńsere alatyn kásiporyndar irikteledi.
Aıta keteıik, ótken jyly Qazaqstannyń damý bankiniń el ekonomıkasyna quıǵan qarjysy 426 mlrd. teńgeni qurady. Atalǵan kezeńde bank jalpy somasy 277,5 mlrd. teńgege 14 ınvestıtsııalyq joba men 10 eksporttyq operatsııany qarjylandyrdy. "Endi, bizdi ekinshi deńgeıli banktermen salystyrýǵa bolmaıdy. Sebebi biz (Qazaqstannyń damý banki "Báterek" ulttyq basqarýshy xoldınginiń quramyna kiredi - avt.) iri kásiporyndarmen jumys isteımiz. Sosyn beriletin zaımdardyń kólemi de az emes", - dep atap kórsetti Jámishev.
