Jámıla Baqbergenova Tıranadaǵy reıtıngtik týrnırdiń chempıony atandy

ASTANA. KAZINFORM — Tıranada (Albanııa) ótip jatqan kúres túrlerinen ІІ álemdik reıtıngtik týrnırde áıelder kúresinen 72 keli salmaqta el namysyn qorǵaǵan Jámıla Baqbergenova Qazaqstan qorjynyna altyn medal syılady.

QR Kúres túrleri federatsııasynyń baspasóz qyzmeti atap ótkendeı, Jámıla Albanııa astanasy Tırana qalasynda bozkileminde 3 beldesý ótkizdi. Salmaǵynda balýan az bolǵandyqtan aınalmaly júıe arqyly ótti.

Otandasymyz aldymen tájirıbeli ýkraınalyq Alla Belınskany 3:1 esebimen jeńse, ekinshi beldesýde amerıkalyq Aleksandra Jýnıs Glaýdeden jeńildi. Sheshýshi beldesýde Argentına balýany Lında Machýkadan aılasyn asyrdy.

Sondaı-aq, 76 kelide kúresken taǵy bir tanymal qazaqstandyq balýan Elmıra Syzdyqova qola medal oljalady. Elmıra alǵashqy aınalymda reseılik Valerııa Trıfonovany qapy qaldyrsa (8:0), shırek fınalda rýmynııalyq Aleksandra Anjeldi aıqyn basymdyqpen jeńdi (12:1). Jartylaı fınalda amerıkalyq Dımon Gýılfordqa ese jiberdi. Al qola medal úshin beldesýde qytaı qyzy Ianglany týshemen jeńip týrnırdiń qola júldegeri atandy.

Buǵan deıin Albanııadaǵy týrnırde erkin kúresten 3 qazaqstandyq balýan medal alǵan. Olar, Bolat Saqaev (86 keli) kúmis alsa, Rýstam Myrzaǵalıev (86 keli) men Muhamed Balǵabaı (61 keli) qola medal oljaǵan.

Grek rım kúresinen 67 kelide Baǵdat Sabaz qola júldege ıe boldy.

Sondaı-aq, keshe Ózbekstan astanasy Tashkentte dzıýdodan ótip jatqan álemdik Grand Slam týrnıriniń ekinshi jarys kúni Abylaıhan Jubanazar el qorjynyna qola medal syılady.