Jámılá Baqbergenova Majarstandaǵy týrnırde kúmis medal aldy
ASTANA. KAZINFORM — Majarstan astanasy Býdapesht qalasynda ótip jatqan halyqaralyq týrnırde áıelder kúresinen álem chempıonatynyń tórt dúrkin júldegeri Jámılá Baqbergenova (72 keli) kúmis júldeger atandy.
Kúres túrlerinen Polyák Imre & Varga János Memorial halyqaralyq týrnırinde qazaqstandyq balýan fınalda úndistandyq Harshıta Harshıtaǵa jol berdi.
Sondaı-aq el quramasy qorjynyna taǵy bir qola medal tústi. Otandasymyz Nılýfar Raıymova (57 keli) qolaǵa qol jetkizdi.
Endi jarys jolyna Tynys Dúbek (62 keli), Irına Kazıýlına (68 keli), Elmıra Syzdyqova (76 keli) shyǵady.
Odan keıin bozkilemge grek-rım kúresiniń sheberleri kóteriledi.
Aıta ketsek, atalǵan jarysqa 14 elden 99 sportshy jınaldy.
Halyqaralyq týrnır 20 shildede máresine jetedi.
