Jámılá Baqbergenova kúresten halyqaralyq reıtıngtik týrnırde jeńiske jetti

ASTANA. KAZINFORM — Almatylyq balýan Jámılá Baqbergenova Albanııada ótken reıtıngtik týrnırde altyn medal jeńip aldy, dep habarlaıdy qalalyq ákimdiktiń baspasóz qyzmeti.

Almatylyq sportshy Jámılá Baqbergenova Tıranada (Albanııa) ótken áıelder kúresinen halyqaralyq reıtıngtik týrnırdiń jeńimpazy atandy.

Almaty qalasy Sport basqarmasy ókilderiniń málimetinshe, sportshy 72 kelige deıingi salmaq dárejesinde baq synady.

Fınalda ol Qyrǵyzstan ókili Nurzat Nurtaevany 14:3 esebimen aıqyn basymdyqpen jeńip, týrnır chempıony atandy.

Fınalǵa deıingi beldesýlerde Jámılá Baqbergenova myqty daıyndyq deńgeıin kórsetti. Alǵashqy aınalymda polshalyq Vıktorııa Cholýıdi 4:3 esebimen tize búktirse, keıin 2023 jylǵy álem chempıony jáne 2024 jylǵy Eýropa chempıony, túrkııalyq Býse Tosýndy 6:1 esebimen jeńdi.

Jartylaı fınalda úndistandyq Dıksha Malıkti 10:0 esebimen merziminen buryn utty. Osylaısha, Jámılá Baqbergenova Qazaqstan quramasynyń qorjynyna halyqaralyq reıtıngtik týrnırdiń altyn medalin saldy.

Budan buryn elordalyq balýan Marlan Muqashev halyqaralyq týrnırdiń qola júldegeri atanǵany belgili boldy.