Jámıla Baqbergenova álemdik reıtıngte kósh basyna shyqty

ASTANA. KAZINFORM - Birikken kúres álemi resmı saıtynda áıelder kúresinen 72 keli salmaqta balýandardyń reıtınginde jańa kóshbasshy anyqtaldy.

Qazirge deıin atalǵan reıtıngte japonııalyq 23 jastaǵy balýan Amı Ishı birinshi orynda turǵan edi. Ol byltyr Albanııa astanasy Tırana qalasynda ótken álem chempıonatynan keıin uzaq ýaqyt boıy ornyn saqtap qalǵan edi. Endigi kezekte bul orynǵa qazaqstandyq 29 jastaǵy sportshy Jámıla Baqbergenova ıe boldy.

Qazaqstan quramasynyń kóshbasshysy bes aıdan astam ekinshi orynda turdy. Azııa chempıonatynda tórtinshi márte altyn alǵannan keıin ol japonııalyq áriptesin artta qaldyrdy. Ol buǵan deıin de óz salmaǵynda kósh basynda bolǵan edi.

Otandasymyz qazirge deıin qurlyqtyq dodada alty márte júldege ilikti. 2020, 2022, 2023, 2025 jyldarda jeńis tuǵyryna kóterilse, 2021 jyly kúmis, 2019 jyly qola júldeger atandy.

Sporttyq jolynda ol 2021, 2022 jáne 2024 jyldary álem birinshiliginiń kúmis júldegeri boldy.

Iordanııa astanasy Amman qalasynda ótken qurlyqtyq doda nátıjesi boıynsha ol óziniń enshisine 10 myń upaı qosty. Al japonııalyq Amı Ishı endi reıtıngte segizinshi orynǵa syrǵyp ketti.