«Jambyldyń bıýstin «jekeshelendirgen» aqsaqal» - BAQ-qa sholý
***
«Egemen Qazaqstan» basylymynyń búgingi sanynda «Jambyldyń bıýstin «jekeshelendirgen» aqsaqal» atty maqala berilgen. «Jón surasa kele belgili boldy, telefon shalyp turǵan adam Ońtústik Qazaqstan oblysyndaǵy Túrkistan qalasynyń janyndaǵy Oranǵaı aýylynyń turǵyny Ábdiǵanı Tashmetov degen aqsaqal eken. Sózinen uqqanym, toqsanynshy jyldary kolhoz keńsesiniń aldyndaǵy tuǵyr tasta turǵan Jambyl Jabaevtyń bıýstin «jekeshelendirip» alypty. «Qujattarym bar» dep qoıady. Habarlasqandaǵy maqsaty, «tarıh pen mádenıetti qasterleıtin esti azamattar bolsa, aqyn músinin solardyń qolyna aman-esen tapsyrsam» degen tilek eken. Al basqa emes, maǵan telefon shalǵany, sirá, jyr alybynyń músinine bir qyzyqsa, aqynnyń atyn ıelenip otyrǵan irgeli oblystyń sheneýnikteri qyzyǵatyn shyǵar, al jýrnalıst inimiz solarǵa gazet arqyly jetkizetin shyǵar dep oılaǵan sııaqty»,-dep jazady maqala avtory.
Osy basylymnyń jazýynsha, Qazaqstan Qorǵanys mınıstri Ádilbek Jaqsybekovtiń Tájikstan Respýblıkasyna resmı sapary bastaldy. Dýshanbede qorǵanys vedomstvosynyń basshysyn Tájikstan Prezıdenti Emomalı Rahmon qabyldady. Ádilbek Jaqsybekov eki jaqty áskerı jáne áskerı-tehnıkalyq yntymaqtastyq pen áskerı bilimniń keleshekte damýyn Tájikstan Qorǵanys mınıstri Sheralı Haırýlloevpen talqylady. Eki el qorǵanys vedomstvosynyń ózara tyǵyz baılanysyn qazaqstandyq jáne tájikstandyq áskerılerdiń TMD, UQShU, ShYU bitimgerlik jattyǵýlaryna qatysýynan ańǵarýǵa bolady. Kelissózdiń qorytyndysy boıynsha Qazaqstan men Tájikstan qorǵanys mınıstrleri Tájikstan Qarýly kúshterine qaıtarymsyz áskerı-tehnıkalyq kómek kórsetý jónindegi kelisimge qol qoıdy. Bul jaıynda «Tájikstanǵa qaıtarymsyz áskerı-tehnıkalyq kómek» degen materıalda berilgen.
***
«Aıqyn» gazeti «Sheneýnikter shetelde qarjy saqtaı almaıdy» degen maqalany oqyrman nazaryna usynyp otyr. Qazaqstanda saıası memlekettik qyzmetshilerge shetelde aktıv ustaýǵa tyıym salynýy múmkin. Qazaqstan halqy osyny qoldap otyr: Qarjy polıtsııasy ózi ázirlep jatqan arnaıy zań jobasyna qoǵamnan tıisti usynys engizilgendigin málimdedi. Halyqtyń bul usynysy eń joǵary deńgeıde qoldaýǵa ıe bolýy ǵajap emes. Aqordada ótken Kásipkerler keńesiniń jıynynda Qazaqstan Kóshbasshysy «Qarjylaryn sheteldegi jyljymaıtyn múlikke emes, ulttyq ekonomıkaǵa ınvestıtsııalaý - qazaqstandyq kásipkerlerdiń patrıottyq boryshy» ekendigin aıta kele, sheneýnikterdi sheteldegi aktıvterinen arylýǵa májbúrlep jatqan kórshi Reseıdiń tájirıbesin tilge tıek etti. Eger bul tyıymdy Parlament depýtattary qoldasa, onda barlyq mınıstrler men olardyń orynbasarlaryna, jaýapty hatshylarǵa, oblys ákimderi men olardyń orynbasarlaryna, sondaı-aq Qazaqstandaǵy barlyq qala, aýdan, kent, aýyl ákimderine, oblys ákimderi apparattarynyń basshylaryna jat jerlerdegi, offshorlardaǵy kompanııalaryn, sondaı-aq qonaqúı, baspana jáne basqa da jyljymaıtyn múlikterin satyp, qutylýǵa, basqa elderdegi bankterdegi esep-shottaryn jabýǵa týra kelmek. Áıtpese, ulttyq zań talaptaryna laıyq emes dep tanylyp, joǵary laýazymdarynan aıyrylady.
«Ionııa shtatynyń okrýgtik sýdıasy Mıchıgan Raımond Voýt femıda ókilderiniń qandaı bolýy qajettigin óz isimen dáleldep berdi. Anyǵyn aıtar bolsaq, ol óz-ózine aıyppul saldy»,-dep jazady «Aıqyn» basylymy. Oqıǵa bylaı bolǵan. Aıyptaýshylar men kýágerlerdiń sózin tyńdaý kezinde sot zalynda aıaq astynan uıaly telefon shyryldap qoıa bergen. Sóıtse, telefonnyń daýysy basqanyki emes, isti júrgizip otyrǵan sýdıanyń óziniki bolyp shyqqan. Sasqanynan Mıchıgan Raımond Voýt apyl-ǵupyl janqaltasyna qolyn salyp, telefonyn tez arada óshirýge májbúr bolǵan. Al AQSh zańy boıynsha sot tyńdaýy bastalar sátte zalǵa kirmesten buryn sýdıalar uıaly telefondaryn múlik saqtaý kamerasyna tapsyrýy kerek. Al Mıchıgan Raımond Voýt asyǵyp júrip uıaly telefonyn ózimen birge sot zalyna alyp kirgen.
- Árıne, bul yńǵaısyz jaǵdaı. Bárimiz de zańnyń aldynda birdeımiz, - degen sýdıa sottaǵy tyńdaý protsesi bitken soń, óz-ózine aıyppul salǵan. Al onyń kólemi - 25 dollar bolyp shyqqan. Sóıtip, ol óz aıaǵymen baryp, sot ǵımaratynyń janyndaǵy bankke aıyppul tólegen.
***
«Kazahstanskaıa pravda» basylymy «S ýchetom mnenııa grajdan» atty materıalda qarjy polıtsııasy tarapynan jemqorlyqqa qarsy zańnamany jetildirý boıynsha azamattardan usynys jınaý sharasy aıaqtalǵanyn jazyp otyr. 9 kúnniń kúnniń ishinde azamattar men úkimettik emes uıymdardan 120 usynys kelip tústi. «Jumys toby múshelerin memlekettik satyp alýlar týraly zańnamany jetildirý brıynsha, jemqorlyq quqyq buzýshylyqtar úshin qylmystyq jáne ákimshilik jaýapkershilikti kúsheıtý, memlekettik qyzmetkerlerdiń shyǵystaryn mindetti deklaratsııalaýǵa baılanysty ıdeıalar aıryqsha qyzyqtyrdy», dep jazady gazet.
