Jambyldyń bıik taýly aımaqtarynda sel júrýi múmkin
TARAZ. QazAqparat - Jambyl oblysynyń bıik taýly aımaqtarynda morena kólderi men erigen qar sýy sý tasqynyna alyp kelýi múmkin. Bul boljam oblys aýmaǵynda ornalasqan morena kólderin baǵalaý barysynda anyqtalǵan, dep habarlaıdy QazAqparat.
Bul týraly oblystyq tótenshe jaǵdaılar departamenti málimdedi. Dese de, departament mamandary óńirde muzdaq-serpindi kólder, qar kóshkini jáne kóshkin qaýpi bar ýchaskeler joq ekenin aıtady.
«24 mamyrda arnaıy komıssııa «Eýrokopter ES-145» tikushaǵymen Jýaly, Merki jáne T.Rysqulov aýdandarynda bıiktigi 2600 m-den 4400 m-ge deıingi beldeýde ornalasqan morena kólderin áýeden sholyp shyqty. Sonymen qatar, sel qaýpi bar ýchaskeler qaraldy. Azamattyq qorǵanys bólimi, Zilzala qaterin azaıtý jáne azamattyq qorǵaý salasyndaǵy baqylaý basqarmasy jáne Qazseldenqorǵaý mamandarynyń mindeti - kólderdiń aǵymdaǵy jaı-kúıin zerdeleý», - deıdi departamenttiń aǵa ınjeneri, azamattyq qorǵaý maıory Aıgúl Shahabaeva.
Sondaı-aq, komıssııa Qyrǵyz jotasy men Talas Alataýy taýlarynda qar qory azaıǵanyn anyqtady. Qazirgi tańda muzdaq kólderdiń beti muzben jáne qarmen jabylýy turaqty baqylaýǵa alynǵan.
«Sý tasqyny men selge baılanysty tótenshe jaǵdaılardyń aldyn alý maqsatynda jergilikti atqarýshy organdarǵa múddeli memlekettik organdarmen jáne uıymdarmen birlesip halyqty, aýmaqty jáne sharýashylyq júrgizý obektilerin tótenshe jaǵdaılardan qorǵaý jónindegi is-sharalar keshenin júrgizý usynyldy», - deıdi A.Shahabaeva.
Aıta keteıik, Jambyl oblysy - elimizdiń sel qaýpi bar aımaqtardyń biri. Ondaǵy Qarataý, Alataý jáne Qyrǵyz jotalarynyń bıik taýly aımaqtary sel bolýy yqtımal óńir retinde tanylyp, turaqty baqylaýǵa alynǵan.
