Jambyldyqtar jyl basynan jol erejesin 7,3 myń ret buzǵan

TARAZ. QazAqparat – Jambyldyq polıtseıler júrgizýshilerdi jol qozǵalysy erejelerin buzbaýǵa jáne qolaısyz aýa raıynda qala syrtyna shyqpaýǵa shaqyrdy, dep habarlaıdy QazAqparat tilshisi.

Jyl basynan beri Jambyl oblysy Polıtsııa departamentiniń patrýldik polıtsııa batalony 7 myń 346 jol erejesin buzý deregin anyqtady. Sonymen qatar, «Arqan» mobıldi keshenimen oblys boıynsha 5 927 ákimshilik quqyq buzýshylyq tirkelgen.

Jyldamdyqty asyrǵany úshin 2 myńnan astam ákimshilik hattama toltyrylǵan. Polıtsııa departamenti patrýldik polıtsııa batalonynyń jeke quramymen túrli quqyq buzýshylyqtar úshin aıyppul turaǵyna 65 avtokólik qoıyldy desek, onyń ishinde 4 avtokóliktiń ıesi mas kúıinde ustalǵan.

«10 aqpannan bastap jol-kólik oqıǵalarynyń qaýipti aımaǵy bolyp tabylatyn «Taraz-Asa» tas jolynda 2 arnaıy «Arqan» mobıldi kesheni ornatyldy, olardyń kómegimen búgingi kúni jyldamdyq rejımin asyrý boıynsha 700-den astam ákimshilik quqyq buzýshylyq anyqtaldy, bul kórsetilgen jol ýchaskesindegi jol jaǵdaıyn edáýir jaqsartty. Aýa-raıynyń qolaısyzdyǵy, qatty jel men tumannyń túsýi, joldardaǵy kóktaıǵaq saldarynan jol-kólik oqıǵasynyń ósý qaýpi artýda. Júrgizýshiler aýa-raıy týraly eskertýlerge nazar aýdaryp, joldaǵy jaǵdaıdy qadaǵalap, óz ómiri men jaqyndarynyń densaýlyǵyna qaýip tóndirmeýi jáne jolǵa shyqpaýy kerek», - delingen oblystyq Polıtsııa departamenti baspasóz qyzmetiniń habarlamasynda.