Jambyldyqtar zańsyz saqtalǵan 200-ge jýyq atys qarýyn óz erkimen tapsyrdy
TARAZ. QazAqparat – Jambyl oblysynnyń turǵyndary zańsyz saqtalǵan 178 birlik qarýdy tapsyrdy,- dep habarlaıdy QazAqparat tilshisi.
Qoǵamdyq qaýipsizdikti qamtamasyz etý jáne atys qarýyn, oq-dáriler men jarylǵysh zattardy paıdalanýǵa baılanysty qylmystardyń aldyn alý maqsatynda Jambyl oblysynyń aýmaǵynda 2020 jylǵy 1 shildeden bastap halyqtan zańsyz saqtalǵan atys qarýyn, oq-dáriler men jarylǵysh zattardy satyp alý jónindegi respýblıkalyq aktsııa ótkizildi.
«Aktsııany ótkizý kezeńinde Jambyl oblysynyń turǵyndarynan zańsyz saqtalǵan qarý-jaraq zattaryn tapsyrý týraly 103 ótinish tústi, 178 birlik atys qarýy tapsyryldy, onyń ishinde 18 birlik oıyq uńǵyly, 158 birlik tegis uńǵyly jáne 2 birlik travmatıkalyq qarý. Tapsyrylǵan atys qarýy úshin jalpy somasy 10 mıllıon 436 myń 946 teńge aqshalaı syıaqy tólendi, – dep Jambyl oblysy PD ÁPB azamattyq jáne qyzmettik qarý aınalymyn baqylaý tobynyń erekshe tapsyrmalar jónindegi aǵa ınspektory Shýhratjon ıÝldashev málimdedi.
QR ІІM nusqaýyna sáıkes 2021 jyly Jambyl oblysynyń aýmaǵynda halyqtan zańsyz saqtalǵan atys qarýyn, oq-dárilerdi jáne jarylǵysh zattardy satyp alý boıynsha aktsııa ótkizý josparlanýda, aktsııany ótkizý úshin 10 mıllıon 404 myń teńge bólindi.
Qarý-jaraq zattaryn erikti túrde tapsyrǵany úshin qarýdyń árbir birligine 29 myń 70 teńgeden, 291 myń 700 teńgege deıin somasynda aqshalaı syıaqy tóleý kózdeleýde. Atys qarýyn, oq-dárilerdi jáne jarylǵysh zattardy qabyldaý Jambyl oblysy PD qalalyq jáne aýdandyq polıtsııa bólimshelerinde júrgiziletin bolady. Bul rette tirkelmegen atys qarýyn, oq-dárilerdi jáne jarylǵysh zattardy óz erkimen tapsyrǵan adamdar qylmystyq jáne ákimshilik jaýapkershilikke tartylmaıdy.
