Jambyldyqtar turmysy tómen otbasylarǵa dári-dármek satyp alýǵa kómektesýde
TARAZ. QazAqparat – Jambyldyqtar muqtaj jerlesterine dári-dármek satyp alýǵa kómektesýde, dep habarlaıdy QazAqparat tilshisi.
Máselen, «Kókjıek-2030» JShS basshysy Ábdiqalı Begembetov oblystyń medıtsınalyq mekemelerine 10 jańa ottegi kontsentratyn tartý etti. Basqa da jambyldyqtar, sonyń ishinde memlekettik qyzmetshiler dári-dármekterdi satyp alýǵa óz kómegin berýde.
Ottegi kontsentrattarynyń beseýi Jambyl oblystyq kópsalaly aýrýhanasyna, qalǵan beseýi Jýaly, Jambyl, Talas, Baızaq jáne T.Rysqulov aýdandarynyń ortalyq aýrýhanalaryna jiberildi. Kásipkerler qazir adamnyń densaýlyǵynan mańyzdy eshnárse joq ekendigin aıtady.
- Aýrý eshkimdi aıap jatqan joq. Mundaı jaǵdaıǵa bárimiz tap bolýymyz múmkin. Kez kelgen otbasynda aýyryp jatqan adamdy kezdestirýge bolady. Ókinishke oraı, keıbiri ajal qushýda. Biz birige otyryp qana bul aýrýdy jeńip, talaıdy dertten aman alyp qala alamyz, - deıdi A. Begembetov.
Al, Taraz qalasy ákiminiń orynbasary Almas Sadýbaev pen «Taraz» áleýmettik-kásipkerlik korporatsııasy» AQ basqarma tóraǵasy Oljas Qarjaýov áleýmettik jaǵdaıy nashar jáne turmysy tómen otbasylarǵa beriletin dári-dármek paketterin tapsyrýda.
«Oblys ákiminiń tapsyrmasyna sáıkes biz «Jaqsylyq jasa, óz halqyńa kómektes!» aktsııasyn bastamaqpyz. Onyń aıasynda «Sýper-Farm» JShS 700 dári-dármek salynǵan paketter ázirleıtin bolady. Taǵy 150 paketti «Taraz» ÁKK» AQ daıyndaıdy. Bizdiń maqsatymyz – mundaı paketterdiń jalpy sanyn myńǵa jetkizý. Qala kásipkerlerin aktsııaǵa barynsha qatysýǵa shaqyramyz. Elimizge birge kómekteseıik! - dedi Oljas Qarjaýov.
Densaýlyq saqtaý basqarmasy basshysynyń orynbasary Hamıt Myrzaqasymov bul paketterdiń praktıkalyq maqsaty týraly toqtaldy.
- Olar dárigerlerdiń talaptaryna sáıkes jınaqtaldy. Pakette antıbıotıkter, dene qyzýyn tómendetetin jáne vırýsqa qarsy preparattar, aýyrsynýdy basatyn dáriler, shprıtster men sıstemalar, glıýkoza men aspırın qamtylǵan. Olar tek klınıkalyq kórsetkishter boıynsha úıde emdelip jatqan adamdarǵa beriledi, - dedi ol.
Basqarma basshysynyń orynbasary paketterdiń tikeleı muqtajdarǵa emes, emhanalar arqyly berilip jatqandyǵyn túsindirdi.
- Dári-dármekterdi dárigerlik nusqaýsyz qabyldaý óte qaýipti. Mysaly, bul pakettegi glıýkoza qant dıabeti men júrek patologııasy bar adamdar úshin zııandy. Basqa da dári-dármekterge qarsy kórsetkishter bar, sondyqtan barlyq protsesti dárigerler mindetti túrde baqylaıtyn bolady, - dep atap ótti ol.
Almas Sadýbaev kásipkerlerge, sondaı-aq «Ámir jáne D» JShS atqarýshy dırektory Lázzat Aıtqulovaǵa jetkizýshilerdiń baǵasy boıynsha dári-dármekter men ottegi kontsentrattaryn satyp alýǵa kómek kórsetkeni úshin alǵys aıtty.
