Jambyldyqtar ózbek kásipkerlerimen birlesip jumys jasamaq

TARAZ. QazAqparat - Jambyl oblysynyń ákimi Kárim Kókirekbaev bastaǵan delegatsııa Ózbekstan Respýbıkasynyń Djızak oblysynda is saparmen júr, dep habarlaıdy «QazAqparat» HAA tilshisi.

Sapar barysynda K. Kókirekbaev Jambyl oblysynda ózbek toqyma buıymdary men turmystyq tehnıka óndirýshileri taýarlarynyń jármeńkesin ótkizý ıdeıasyn aıtty. Óıtkeni Djızak oblysynda shyǵarylǵan toqyma men turmystyq tehnıka buıymdary sapaly jáne baǵasy qazaqstandyq baǵamen salystyrǵanda 25-30%-ǵa arzan eken.

Jambyldyq delegatsııa qatysýshylarynyń pikirinshe, mundaı jármeńke ótkizý oblys turǵyndary úshin tamasha syı bolary shyndyq. Budan basqa, oblys ákimi Djızak óńiriniń AEA dıodty sham, shyny maqta, akkýmýlıator shyǵaratyn zaýyt basshylarymen birlesip jumys jasaýǵa usynys bildirdi.

«Biz ózbek kásipkerlerimen birlesip jumys jasaýǵa daıynbyz. Ákimshilik máselelerdi sheshemiz, tipti birlesken kompanııalarǵa ǵımarat ta beremiz. Bastysy, jańa jumys oryndaryn ashý, jumyskerlerdiń áleýmettik qorǵalýyn qamtamasyz etý», - dedi K. Kókirekbaev.

Sapary aıasynda ákim Djızak turǵyndaryn Astanada ótip jatqan «EKSPO-2017» halyqaralyq kórmesin tamashalaýǵa shaqyrdy.

Kezdesý qorytyndysy boıynsha ózara tıimdi yntymaqtastyqty damytý týraly sheshim qabyldandy. Bilim berý, densaýlyq saqtaý, saýda salasyndaǵy birqatar memorandýmdarǵa, sondaı-aq Jambyl oblysynda djızaktyq ónerkásipti jáne aýyl sharýashylyǵy ónimderin jetkizý boıynsha ózbek jáne qazaq kompanııalary arasyndaǵy eksporttyq kelisimsharttarǵa qol qoıyldy.