Jambyldyqtar Naýryz merekesin joǵary kóńil-kúımen qarsy aldy
Qazaq úıler adamdardyń jappaı jınalýyn boldyrmaý maqsatynda Taraz qalasynyń túrli aýdandarynda az mólsherde ornalasty. Soǵan qaramastan dýmandy sharalar tıisti deńgeıde uıymdastyryldy desek, aýa-raıynyń da jyly shyraı tanytqany tamasha áser syılady. Tańerteń kún kózi sál bulttanǵandaı kóringenimen, keıinnen jadyrap sala bergeni Naýryzdyń mán-mańyzyn arttyra túskendeı.
Aımaq basshysy aldymen «Kóne Taraz» tarıhı-mádenı kesheniniń alańynda boı kótergen Taraz óńirlik ýnıversıtetiniń kıiz úıine baryp, qazaqy saltpen qymyzdan dám tatty. Berdibek Saparbaev Naýryz meıramynyń ulttyq salt-dástúrlerdi jańǵyrtý, jas urpaqty ultjandylyq pen Otanǵa degen súıispenshilik rýhynda tárbıeleýde aıryqsha mańyzǵa ıe ekendigin atap ótti. Al ýnıversıtet stýdentteri shaǵyn sahna arqyly qazaqtyń «Besikke salý», «Azan shaqyryp, at qoıý» jáne taǵy basqa da salt-dástúrlerdiń úlgisin kórsetti.
Sondaı-aq, Taraz ınnovatsııalyq-gýmanıtarlyq ýnıversıtetiniń kıiz úıinde qolóner buıymdary men ulttyq kıimder kórmesi kópshilik nazaryna usynyldy. Oblys ákimi kórmedegi dúnıelerge tánti bolyp, joǵary baǵalasyn berdi. Ýnıversıtet rektory Erbolat Saýryqov Berdibek Saparbaevqa oqý ordasy «Kórkemóner jáne syzý» mamandyǵy boıynsha oqytýshylar daıyndaıtynyn, keıin olar balalardy halyqtyq qolónerge baýlıtynyn jetkizdi. Kórmege qoıylǵan buıymdardyń basym bóligi, sonyń ishinde aǵashtan, metaldan jáne bylǵarydan jasalǵan dúnıeler TIGÝ stýdentteri men magıstranttarynyń dıplomdyq jumystary bolyp tabylady desek, qalǵandary ýnıversıtet murajaıynyń qorynan alynǵan zattar. Óńir basshysynyń qyzyǵýshylyǵyn oıatqan buıymdardyń biri – ydystardy tasymaldaýǵa arnalǵan, sapaly bylǵary qorjyndar.
«Qazfosfat» JShS-niń kıiz úıiniń aldynda Berdibek Saparbaev jambyldyqtardy kóktemniń basty merekesimen quttyqtap, izgi lebizin jetkizdi.
«Tamyry tereńnen bastaý alatyn bul mereke – birlik pen berekeniń sımvoly. Naýryz – qazaq halqynyń tirshiliginiń kórinisi, joǵary rýhtyń, ulttyq mádenıet pen ónerdiń, salt - dástúrdiń ózegi bolyp sanalady», - dep atap ótti oblys ákimi.
Budan soń aımaq basshysy kishkentaı Erjan Janmuhammedtiń tusaýyn kesip, búldirshinniń el azamaty bolyp erjetýin jáne onyń ata-anasyna myqty densaýlyq tiledi.
«Kóne Taraz» kesheniniń jaıaý júrginshiler aımaǵyn jaǵalaı ártúrli kádesyılar, ydys-aıaq, sándik buıymdar jáne basqa da kóztartar zattardyń pavılondary ornalasty.
Týrızm jáne halyqtyq qolóner ortalyǵynda sheber Pernebek Ahmetov shaǵyn sómkege syıyp ketetin jınalmaly aǵash besigimen tanystyrdy. Qos qoly joq Anar Beksultanova tikken túrli qazaqy oıýly kórpeler men jastyqtardy kórgender onyń batyldyǵy men eńbekqorlyǵyna tánti boldy. Іsmer ózinen bólek úsh adamdy jumyspen qamtyp otyr.
«Anar sekildi adamdardan úlgi alý kerek. Taǵdyrdyń soqqysyna boı aldyrmaı, aıanbaı eńbek etip, óz maqsatyna jetýdiń úlgisi osyndaı bolady dep oılaımyn», - dep atap ótti aımaq basshysy.
Jastar alleıasynda aımaq basshysyn bilim salasynyń ardagerleri qarsy aldy, úlken ekran ornalasqan sahnada mektepten tys shyǵarmashylyq ortalyǵynyń tárbıelenýshileri bı bılep, ónerlerin ortaǵa saldy. Mektepten tys jumys jáne balalar shyǵarmashylyǵy ortalyǵy jáne kórkemsýret mektebi oqýshylarynyń eńbekteri boıynsha kórme uıymdastyrylyp, onda kartınalar men kıiz jáne toqyma buıymdary qoıyldy. Jas sýretshiler sol mańdaǵy oqıǵalardy birden qaǵaz betinen túsirip, kóptiń qyzyǵýshylyǵyn oıatty.
Sonymen qatar, Qaırat Rysqulbekov saıabaǵynda sporttyq jarystar uıymdastyryldy. Al, Tuńǵysh Prezıdent saıabaǵynyń aldyndaǵy alań ulttyq oıyndardan bólek ózderiniń kórkem sýretterin usynǵan jergilikti kolledj stýdentterine arnaldy. Merekelik aralaý «Balasaǵun» ortalyq kontsert zalynyń aldyndaǵy oblystyq fılarmonııa ártisteri daıyndaǵan ashyq aspan astyndaǵy úlken kontsertpen tııanaqtaldy. Onda qazaqtyń halyq ánderi shyrqalyp, jyr alyby – Jambyl Jabaevtyń 175 jyldyǵyna oraı ónerpazdar Jambyl men Aıkúmis arasyndaǵy aıtys qoıylymyn jurtshylyq nazaryna usyndy.
