Jambyldyqtar London Olımpıadasynyń júldegeri Aqjúrek Tańatarovty «Jyl sportshysy» atady
TARAZ. 8 qańtar. QazAqparat - «Jyl sportshysyn» anyqtaý kezinde jambyldyqtardyń basym bóliginiń tańdaýy Olımpıada júldegeri Aqjúrek Tańatarovqa tústi. Oblystyq «Znamıa trýda» gazetiniń óńir turǵyndary arasynda júrgizgen daýys berý nátıjesi osyny kórsetip otyr.
Esterińizge sala keteıik, 26 jasar Aqjúrek Tańatarov Londonda ótken Olımpıadada erkin kúresten 66 kelige deıingi salmaq dárejesinde óner kórsetken bolatyn.
Sportshynyń endigi jospary - 2013 jyly qyrkúıekte Ázirbaıjanda ótetin álem chempıonatyna, sondaı-aq halyqaralyq týrnırler men Álem kýbogyna qatysý.
«Ózimniń daıyndyq deńgeıimdi álem chempıonatynda synap kórmekpin, chempıon atanýdy kózdep otyrmyn», - dedi A. Tańatarov.
2012 jylǵy jambyldyq erkin kúres sheberleriniń óner kórsetýine baǵa bergen ol Jambyl oblysy tarıhynda buǵan deıin mundaı jemisti jyl bolǵan emes dep atap ótti.
