Jambyldyqtar karantınge qaramastan úılený toıy men betashar ótkizýde – Saparbaev
TARAZ. QazAqparat – Óńirloik kommýnıkatsııalar qyzmetinde ótken baspasóz-máslıhatynda Jambyl oblysynyń ákimi Berdibek Saparbaev oblys turǵyndaryn kezekti ret karantın kezinde otbasylyq jappaı is-sharalardy ótkizbeýge jáne olarǵa qatyspaýǵa shaqyrdy, dep habarlaıdy QazAqparat tilshisi.
«Men oblys turǵyndaryna taǵy da eskertkim keledi. Qazir bári ózimizge baılanysty. Biz jaqyndarymyz ben aınalamyzdaǵylar jáne bizdiń kómegimiz ben qoldaýymyzǵa muqtaj jandar úshin jaýapty ekenimizdi umytpaýymyz kerek. Men jambyldyqtardy barlyq sanıtarlyq jáne karantın sharalaryn qatań saqtaýǵa shaqyramyn. Qart adamdardan qajetsiz syrtqa shyqpaýyn suraımyn. Oblysta 300-den astam egde jastaǵy adam koronavırýspen aýyrǵan. Ókinishke oraı, qart kisiler buqaralyq otbasylyq sharalarǵa, úılený toılaryna, betasharlarǵa, qudalyqtarǵa barýdy jalǵastyrýda. Osylaısha siz óz týystaryńyz ben jaqyndaryńyzdyń deńsaýlyǵyna qaýip tóndiresiz. Ondaı bolsa balalaryńyz ben nemerelerińizge qandaı úlgi kórsetesizder?» - dedi Saparbaev brıfıngide.
Aımaq basshysy azamattarǵa tek resmı aqparat kózderine senýdiń, jalǵan nemese naqty emes aqparattardy taratpaýdyń mańyzdylyǵyn basa aıtty.
«Túrli arandatýshylyqqa boı aldyrmańyzdar. Kez kelgen aqparatty tıisti memlekettik organdarda tekserýge bolady. Eger árqaısymyz qazirgi jaǵdaıdyń kúrdeliligin sezinip, túsinetin bolsaq, qabyldanǵan barlyq sharalar óz nátıjesin beretin bolady. Ol úshin memleket, qoǵam, azamattar birlesip áreket etý qajet», - dep túıindedi ol.
Búgingi tańda oblysta koronavırýs ınfektsııasynyń 1 866 jaǵdaıy tirkelgen. Onyń ishinde: 865 – sımptomdyq naýqastar bolsa, 1 001-i sımptomsyz. Іndet juqtyrǵandardyń 305-i zeınetker, 475-i jumyssyz, 68-i júkti áıel, 121-i áskerı qyzmetshi, 100-ge jýyǵy balalar men mektep oqýshylary.
