Jambyldyqtar elordadaǵy jármeńkege 300 tonnaǵa jýyq aýyl sharýashylyǵy ónimin ákeledi
TARAZ. QazAqparat – Tarazdan elordaǵa avtokerýen attandy. Kerýen quramynda jergilikti aýyl sharýashylyǵy taýar óndirýshileriniń ónimderi tıelgen on úlken júk avtomobıli bar, dep habarlaıdy QazAqparat tilshisi.
12-13 qyrkúıek aralyǵynda Nur-Sultan qalasyndaǵy Han shatyr saýda oıyn-saýyq ortalyǵy janyndaǵy alańda ótetin jármeńkede Jambyl oblysynyń ónimderi satylatyn bolady.
Olar elorda turǵyndaryna quny 320 mıllıon teńge bolatyn 282,6 tonna azyq-túlik ónimderin usynbaq. Tońazytqyshtarmen jabdyqtalǵan avtokóliktermen elordaǵa et, balyq, shujyq, sút, kondıterlik jáne makaron ónimderi, ósimdik maıy, bal, keptirilgen jemister men kókónister jetkizilmek.
Olardyń bári naryq baǵasynan 10-20 paıyzǵa tómen satylatyn bolady.
Ónimderdi Jambyl oblysynyń 10 aýdany men Taraz qalasynan 90 aýylsharýashylyq taýar óndirýshileri usynýda.
T. Rysqulov aýdanynan elordaǵa «Podgornoe» JK-niń quny 1,5 mıllıon teńgenińshujyq ónimderi jóneltilgen.
«Bul óz ónimderimizdi eshqandaı deldaldarsyz ótkerýge, básekelestik ortany zerdeleı túsýge jaqsy múmkindik. Eger elordalyqtar bizdiń ónimderimizge joǵary suranys tanytyp jatsa, onda ol jaqqa óz taýarymyzdy turaqty túrde jóneltip turatyn bolamyz», - deıdi shujyq tsehynyń basshysy Marına Ilınyh.
Baızaq aýdanynyń «Raýshan» sharýa qojalyǵy Nur-Sultanǵa qara órik, alma, jylyjaı qııary men qyzanaq, júzim, al Jambyl aýdanynyń «Asa – Damý» JShS bes myń dana jumyrtqa jibergen.
Jármeńkede talastyq «Aıanur» jáne «Aınar» sharýa qojalyqtary eki tonna sıyr
etin kelisin 1700 teńgeden satýdy josparlap otyr.
Aıta keteıik, barlyq ónimder sanıtarlyq-veterınarlyq talaptarǵa sáıkes keledi jáne taýardyń sapasy men shyǵýy týraly sertıfıkattarǵa ıe.
Aýyl sharýashylyǵy basqarmasy basshysynyń orynbasary Qaırat Amanovtyń aıtýynsha, aýyl sharýashylyǵy ónimderiniń jármeńkesi óńiraralyq yntymaqtastyqty damytý maqsatynda ótkizilýde.
