Jambyldyqtar Áz-Naýryzdy 9 kún toılaıdy
Brıfıngke oblys ákimdigi ishki saıasat basqarmasynyń basshysy Berik Ýálı, mádenıet, arhıvter jáne qujattama basqarmasynyń basshysy Dúısenáli Byqybaev, Taraz qalasy ákiminiń orynbasary Kenjebek Oljabaı qatysyp, BAQ ókilderiniń saýaldaryna jaýap berdi. Aldymen spıkerler «Qosh keldiń, áz Naýryz!» merekesin uıymdastyrýdyń is-sharalar jospary týraly tolyǵyraq málimet berdi.
Dúısenáli Byqybaevtyń aıtýynsha, merekeni toılaý óńirde búginnen bastaý almaq.
«14 naýryz - «Amal» kúni. Jurt amandyq-saýlyq surasyp, úlken-kishi qystan aman-esen shyǵyp, Áz Naýryzǵa jetkenine shúkirshilik etip, bir-birine izgi tilekter aıtady. Sondaı-aq, qalalyq mádenıet úıiniń aldynda «Amal kúnine» oraılastyrylǵan qoıylymdar uıymdastyrylyp, baýyrsaqtar taratylady. Al 15 naýryz - «Taǵyzym» kúni qasıetti juma kúnine oraılastyrylyp qoıylǵandyqtan «Óli razy bolmaı, tiri baıymaıdy» degen qaǵıda boıynsha ata-baba rýhyna Quran baǵyshtalady. 16 naýryz - «Alas» kúni tazalyqqa mán berilip, «Bulaq kórseń - kózin ash!» degen atpen jalpyhalyqtyq senbilik ótkiziledi»,-deıdi Dúısenáli Byqybaev.
Sondaı-aq, 17 naýryz - «Meıirim» kúni belgilenipti. Bul kúni kóp balaly analarǵa, áleýmettik ahýaly tómen otbasylarǵa, kómekke muqtaj múgedek jandarǵa qaırymdylyq jasalady. Al, 18 naýryz - «Yntymaq» kúni, 19 naýryz - «Jańarý kúni», 20 naýryz - «Bereke kúni» dep atalyp, taqyrypqa oraı ár kúni merekelik dýmandar, ıgi sharalar uıymdastyrylmaq.
Aıta ketý kerek, 21 naýryz - Ulystyń Uly kúni qarsańynda Y. Súleımenov kóshesiniń boıyndaǵy kúrdeli jóndeýden ótken saıabaq «Jastar alleıasy» dep qaıta atalyp, paıdalanýǵa beriledi. Atalǵan saıabaqta «Mahabbat» alleıasy, «Bilim» alańy, «Jastar» ınternet-kafesi, «Kitap» jáne «Sahna» alańshasy ashylmaq.
«Aıtýly merekeniń sońǵy kúni 22 naýryz - «Jańa kún», ıaǵnı oblys jáne aýdan turǵyndary jalpyhalyqtyq serýenge shyǵady. Turǵyndar óz jaqyndaryn, týystaryn, kórshileri men alys-jaqyn aǵaıyndaryn merekemen, «Jańa jyldyń» alǵashqy «Jańa» kúnimen quttyqtaıdy», - dedi Berik Ýálı.
