Jambyldyqtar az qamtamasyz etilgen otbasylarǵa dári-dármek alyp berý úshin 48 mln teńge jınady
TARAZ. QazAqparat - Taraz qalasynyń №5 emhanasyna 27 mıllıon teńgeden astam somaǵa dári-dármekter men medıtsınalyq buıymdardyń iri partııasy jetkizildi, dep habarlaıdy QazAqparat Jambyl oblysy ákimdiginiń resmı saıtyna silteme jasap.
Olardyń ishinde dene qyzýyn túsiretin, qabynýǵa qarsy dári-dármekter, antıbıotıkter, bir rettik shprıtster bar. Olar osy jerden arnaıy tizimge sáıkes oblys boıynsha medıtsınalyq kómekke muqtaj adamdarǵa taratylmaq.
Bul qaıyrymdylyq aktsııasynyń ótýine kóptegen adamdar atsalysa bildi.
- Oblys ákimi Berdibek Saparbaev kásipkerlermen arnaıy kezdesip, otandastarymyz úshin qoldan keletin barlyq múmkindikterdi jasaýǵa shaqyrdy. Keıinirek maǵan Densaýlyq saqtaý basqarmasynan qońyraý shalyp, ınfektsııalyq aýrýhana úshin ottegi tútikterin satyp alýǵa kómektesýimdi surady. Jalǵyz ózime kóp nárse jasaý múmkin emes, sondyqtan men ózim jaqsy tanıtyn iri kásipkerlerge telefon shaldym. Olar bul usynysymdy birden qoldady. Osylaısha biz atalǵan tútikterge aqsha jınap berdik, sondaı-aq qarjy 11 kontsentrator apparatyn alýǵa jetti, - deıdi «Altaıs Grýpp» JShS-niń Bas dırektory Álibek Jumabaev.
Budan soń dári-dármek satyp alý úshin 48 mıllıonǵa jýyq qarajat jınaldy. Jalpy alǵanda, jambyldyq 20 iri kompanııa basshysy pandemııamen kúreske shamamen 70 mıllıon teńge qarjy bóldi.
Aqsha jınalyp, maqsat aıqyndalǵannan keıin bul isti úılestirýge «Taraz» ÁKK UK« AQ atsalysqan.
- Biz úılestirýshi retinde Shymkent qalasyndaǵy «Zerde« medıtsınalyq qoımasymen jetkizip berý boıynsha ýaǵdalastyq. Sondaı - aq, ÁKK taýarlardy tasymaldaýdy barynsha qamtamasyz etti. Ázirge 27 mıllıon teńgege dári-dármekter jetkizilse, jaqyn kúnderi taǵy 20 mıllıon astam qarjyǵa preparattar ákelinetin bolady, - deıdi «Taraz« ÁKK basqarma tóraǵasy Oljas Qarjaýov.
Osylaısha, jambyldyq bılik ókilderi, kásipkerler men qoǵam belsendileriniń uıymdasqan ári jedel áreketi kóptegen naýqastardyń saýyǵýyna úmit syılady. Sony tilge tıek etken oblys ákiminiń birinshi orynbasary Bekbolat Orynbekov, indetpen kúreste kúsh biriktirýdiń mańyzdylyǵyn alǵa tartyp, birlesip qana barlyq qıyndyqtardy jeńýge bolatynyn jetkizdi.
