Jambyldyqtar asarlatyp, 50-ge jýyq muqtaj otbasyǵa úı salyp berdi
TARAZ. QazAqparat – Jambyl oblysynda «Asarlatyp úı salý» jobasy boıynsha aǵymdaǵy jyly 117 muqtaj otbasynyń baspanaly bolýy josparlansa, qazirgi tańda 46 úı paıdalanýǵa berilgen,- dep habarlaıdy QazAqparat tilshisi.
Jambyl oblysynyń ákimi Berdibek Saparbaevtyń bastamasymen qolǵa alynǵan «Asarlatyp úı salý» jobasy kóptiń kóńilinen shyǵyp, keń qoldaýǵa ıe boldy. Barlyq aýdanda júzege asyp jatqan joba aıasynda aýyldastary muqtaj otbasylarǵa baspana salyp berýde belsendilik tanytýda.
Jaqynda joba sheńberinde Jambyl aýdany Ernazar aýylyndaǵy kópbalaly áke Nurbol Altynbekuly úıli boldy. Aýyldarstary asarlatyn salyp bergen tórt bólmeli úı jylytý júıelerimen qamtylyp, ishki bólmeleri jabdyqtalǵan. Igi iske barsha ernazarlyqtar jumyldyrylǵan desek, ony aýyl ákimdigi uıymdastyryp, kem-ketigin túgendegen.
«Aldymen alǵysty aýyl turǵyndaryna, sharýa qojalyq tóraǵalaryna, jomart kásipkerlerge bildirgenimiz jón bolar. Osynda asarlatyp úı salyp jatyr ekensizder dep qarjylaı qoldaý kórsetýge, qol kómegin sozýǵa qaıyrylǵan azamattardyń qaıyrly amaldary ózderine eselep qaıtsyn. Oblys ákiminiń bul jobasy turǵyndar arasyn jaqyndastyryp, meıirimdilik pen qamqorlyqtyń úlgisin qalyptastyrdy. Biz, ernazarlyqtar, baspanadan bala-shaǵanyń syńǵyr kúlkisin estý úshin aıanyp qalǵan joqpyz. Peıilimizge qaraı, maqsatymyzǵa da jettik. Qonys qutty bolsyn, – dedi aǵynan jarylyp aýyl ákimi Myrzahan Ábdiqulov.
Aıta keteıik, «Asarlatyp úı salý» joba aıasynda oblys boıynsha 101 úı salý jáne 16 úıdi kúrdeli jóndeýden ótkizý josparlanǵan bolsa, búgingi tańda 46 úıdiń qurylysy aıaqtalǵan. Atap aıstsaq, Jýaly aýdanynda 10 úı, Baızaq jáne Qordaı aýdandarynda toǵyz úıden, Merki, Moıynqum, Sarysý aýdandarynda tórt úıden, Jambyl aýdanynda 3 úı paıdalanýǵa berilgen. Al, Talas, T.Rysqulov, Shý aýdandarynda bir-bir úıden salynǵan.
