Jambyldyqtar ádemi nómir alý úshin 73 mıllıon teńge qarajat jumsaǵan
TARAZ. QazAqparat – Jambyl oblysynda avtokóliktiń «ádemi» nómirin unatatyn azamattar bıýdjetke 73 mıllıon teńgeden astam qarajat aýdarǵan, dep habarlaıdy QazAqparat tilshisi.
Ákimshilik polıtsııa bólinisteri jol qozǵalysy qaýipsizdigin qamtamasyz etý jelisi boıynsha memlekettik qyzmettiń úsh túrin kórsetedi: olar kólik quralynyń sáıkestendirý nómiri boıynsha kólik quraldarynyń jekelegen túrlerin memlekettik tirkeý jáne esepke alý, kólik quraly úshin memlekettik tirkeý nómiri belgisiniń nusqasyn berý, júrgizýshi kýálikterin berý.
«Jyl basynan beri kólik quraldaryn tirkeý jáne esepten shyǵarý boıynsha 89 274 memlekettik qyzmet kórsetildi, 32 140 júrgizýshi kýáligi berildi. 3751 adam júrgizýshi kýáligin alǵash ret alǵan», – dedi Jambyl oblysynyń PD protsessıng ortalyǵynyń bastyǵy Aıbek Kóshekov.
Onyń ishinde «Azamattarǵa arnalǵan úkimet «Memlekettik korporatsııasy» kommertsııalyq emes aktsıonerlik qoǵamy (mamandandyrylǵan HQKO) arqyly 83 391 adamǵa kólik quraldaryn tirkeý jáne esepten shyǵarý boıynsha memlekettik qyzmet kórsetildi, 19 375 azamatqa júrgizýshi kýáligi berildi. Al, «Elektrondyq úkimet» www.egov.kz « portaly arqyly 5 883 kólik quraly tirkelip, 12 765 júrgizýshi kýáligi berildi.
«Jalpy somasy 73 mıllıon 162 myń 396 teńgege joǵary suranystaǵy nómirlerdiń 289 jıyntyǵy berildi. Óńir turǵyndary arasynda 010 – nan 090, 077, 707-ge deıingi tsıfrlyq belgileri bar nómirler úlken suranysqa ıe – mundaı memlekettik tirkeý nómirlik belgileriniń 156 jıyntyǵy satyp alyndy»,-deıdiń A.Kóshekov.
