Jambyldyq jumysshylarǵa 108 mln teńge jalaqy qaryzy tólenbeı kelgen
Jalpy, eńbek daýlary men narazylyqtarǵa negiz bolatyn birden bir sebep — jalaqynyń ýaqytyly tólenbeýi.
Bul týraly óńirlik kommýnıkatsııalar qyzmeti alańynda ótken brıfıngte Jambyl oblysy ákimdigi eńbek ınspektsııasy basqarmasynyń basshysy Qaırat Dosaev aıtty.
«Aǵymdaǵy jyldyń qańtar-sáýir aılarynda oblystaǵy eńbek qatynastarynyń ahýaly turaqty bolyp, eńbek shıelenisteri tirkelgen joq. Degenmen, jekelegen kásiporyndarda jumyskerlerdiń tarapynan jalaqyny kóterý máselesine qatysty áleýmettik jeliler, ujymdyq aryzdar arqyly óz talaptaryn bildirý faktileri «Jambyl tsement óndiristik kompanııasy» jaýapkershiligi shekteýli seriktestiginde jáne «Qazaqtelekom» AQ-nyń oblystyq fıalynyń Talas, Qordaı, Taraz bólimshelerinde oryn alǵan. Bul máselelerge qatysty tıisti túsindirme jumysy júrgizilip, jumyskerlerdiń talaby ishinara qanaǵattandyryldy», - dedi Qaırat Áskerbekuly.
Bıyldan bastap respýblıkalyq úshjaqty komıssııa sheshimimen «Eńbek táýekel kartasy» apta saıyn monıtorıngten ótkizilip, turaqty baqylaýǵa alynǵan.
Bul baǵytta oblystyń «Ystyq núkte» kartasy ázirlenip, oǵan eńbek daýlary týyndaý qaýpi bar 45 nysan engizilip, turaqty túrde jumys júrgizilýde.
«Bıyl aımaqta eńbek ınspektorlarymen jeke jáne zańdy tulǵalardyń 300 aryz-shaǵymy qaralǵan. Ol boıynsha 20 tekserýler ashylyp, eńbek zańnamasyn buzýdyń 16 faktisi anyqtalǵan. Al, jalpy sommasy 889,7 myń teńgeni quraıtyn 7 aıyppul salynsa, oryndalýy mindetti 9 nusqama berilgen. Budan bólek, tekserister ashpaı, jumys berýshi men jumyskerdi tabystyrý sharalary arqyly 14 jumyskerdiń máselesi oń sheshimin tapty», - dedi spıker.
Inspektsııa tarapynan áleýmettik-eńbek salasyn tsıfrlandyrý, ıaǵnı E-HR júıesine eńbek sharttary engizilip jatyr.
Búginde oblysta 10 048 kásiporyn jumys istep tursa, onyń búgingi kúnge 5651-inde 189 178 jumyskerdiń eńbek sharty elektrondy formatqa aýystyrylǵan.
