Jambyldyq jumysqa ornalasý úshin 660 myń teńge bergen
TARAZ. QazAqparat - Taraz polıtseıleri alaıaqtyq jasady degen kúdikpen azamatqa qatysty sotqa deıingi tergeý amaldaryn bastap ketti, dep habarlady Jambyl oblystyq ІІD baspasóz qyzmetinen.
«10 qyrkúıekte Taraz qalalyq ІІB №2 polıtsııa bólimine Jambyl aýdany Jalpaq tóbe aýylynyń 35 jastaǵy turǵynynan aryz tústi, - delingen baspasóz qyzmetiniń habarlamasynda. - Málimdemede japa shegýshi 16 tamyzda Abdýrashıd esimdi tanysy, senimine kirip, jumysqa ornalastyramyn dep aldap, 660 myń teńge kóleminde qarajatyn ıemdenip ketken. Qolyna qarajat túsken soń ol izin sýytypty».
Aryz berýshi polıtsııada jumyssyz otyrǵanyn aıtty. Burynǵy tanysy bolsa eki qolǵa bir kúrek tabýǵa kómektesemin dep sóz berip, bul kómegi úshin 660 myń teńge aldy. Alaıda tanysy aqshany alǵannan keıin joǵalyp ketti, telefonǵa da jaýap bermeıdi, dedi oblystyq ІІD.
Jedel-izdestirý sharalary nátıjesinde tártip saqshylar alaıaqty qolǵa túsirdi. Bul 50 jastaǵy Taraz turǵyny bolyp shyqty.
Qazirgi ýaqytta A. azamatyna qatysty QR QK 190 babynyń 1 tarmaǵyna sáıkes sotqa deıingi tergeý amaldary júrgizilýde, dedi Jambyl oblystyq ІІD baspasóz qyzmetinde.
