Jambyldyq ustazdardyń jalaqysy qansha bolady
TARAZ. QazAqparat – Jambyl oblystyq bilim basqarmasy jańa oqý jylynda pedagogtar jalaqysyn tóleý júıesi qalaı ózgeretinin aıtyp berdi, dep habarlaıdy QazAqparat.
«Jambyl oblysyndaǵy ustazdardyń 60 paıyzynan astamy jańartylǵan bilim mazmuny boıynsha arnaıy kýrstan ótti. Memleket basshysynyń tapsyrmasyna sáıkes, 2018 jylǵy 1 qańtardan bastap jańartylǵan bilim mazmunyna kóshken 16 363 jambyldyq ustazdyń (66,3%) jalaqysy 30 paıyzǵa kóbeıdi. Búgingi tańda bul kórsetkish ósip jatyr. 1 qyrkúıekten bastap 2 myńnan astam pedagogtyń eńbekaqysy biliktiligine qaraı 30-50 paıyzǵa artady. Ótken oqý jylynda óńirdegi úsh tildi bilim berý baǵdarlamasyna kóshken 185 mektepte bıologııa, hımııa, fızıka jáne ınformatıka pánderi aǵylshyn tilinde oqytyla bastady», - dep málim etti vedomstvodan.
Oblystyq bilim basqarmasynyń basshysy Rahııa Turmahanbetovanyń aıtýynsha, mektepke deıingi mekemelerde 6330 pedagog eńbek etip júr. Onyń 4 myńnan astamy – tárbıeshiler.
«Arnaıy joǵary, tehnıkalyq jáne kásibı mektepke deıingi bilimi bar ustazdar sany sońǵy eki jylda 14,3 paıyzǵa artyp, 45,5 paıyzǵa jetti. Memleket basshysynyń tapsyrmasymen 1 qańtardan bastap tárbıeshilerdiń jalaqysy orta eseppen 20% kóbeıdi (65 900 teńgeden 79 800 teńgege deıin). Eńbek ótili bar tárbıeshi kómekshisiniń aılyǵy 36% ósedi (41 127 teńgeden 55 922 teńgege)», - deıdi Rahııa Turmahanbetova.
