Jambyldyq ustazdar bilim berý salasyndaǵy ózekti máselelerdi talqylady
ASTANA. QazAqparat - Jambyl oblysyndaǵy bilim berý mekemeleriniń qyzmetkerleri ustazdardyń kásibı biliktiligin kóterý men úzdik ınnovatsııalyq tájirıbelerin damytý jaıyn talqylady.
Bul týraly Taraz memlekettik pedagogıkalyq ınstıtýtynyń resmı ókili Jandar Asan málim etti, dep habarlaıdy QazAqparat.
Onyń aıtýynsha, TarMPI-dyń uıytqy bolýymen uıymdastyrylǵan «Qazaqstannyń úshinshi jańǵyrýy: bilim berýdegi ınnovatsııalar jáne tájirıbe» atty pedagogıkalyq oqýlar aıasynda ótken alqaly jıynda bilim men ǵylymdy ıntegratsııalaýdaǵy jańashyldyqtar, dýaldy bilim berý júıesinde básekege qabiletti pedagog kadrlardy daıyndaýdyń mańyzy, jańartylǵan bilim berý mazmunynda pedagogtiń kásibı sheberligin arttyrý men ózekti máselelerdi sheshý joldary jáne Nazarbaev Zııatkerlik mektepteriniń ınnovatsııalyq is-tájirıbesin zerdeleý syndy máseleler sóz boldy.
«Basqosýda bilim berý mazmunyn jańartý, pedagogıkalyq mamandyqtardaǵy menedjment, pedagogıkalyq kadrlardy daıarlaýda jáne biliktiligin arttyrýda jańa amaldardy júzege asyrý syndy bilim berý júıesiniń negizgi trendterin aıqyndaıtyn máseleler qarastyryldy. Bulardyń barlyǵy naryqtyq ekonomıka jaǵdaılarynda ómir súrý talaptaryna sáıkes óz bilimi men mádenıetin úzdiksiz arttyrýǵa, álemdik aqparattyq keńistikte birigýge qabiletti erkin jáne syn turǵysynan oılaı alatyn tulǵany tárbıeleý, oqytý jáne damytý jaǵdaılaryn qamtamasyz etýdi sheshýge baǵyttalýy tıis», - deıdi ol.
