Jambyldyq turǵyn jaıylymnan 15 bas jylqysyn tappaı qalǵan

TARAZ. QazAqparat – Jambyldyq polıtseıler quny 9 mıllıon teńgeni quraıtyn mal urlyǵyn ashty, dep habarlaıdy QazAqparat tilshisi.

Jambyl aýdanynyń polıtsııa bólimine 70 jastaǵy turǵyn habarlasyp, jaıylymdaǵy maly urlanǵanyn aıtqan. Jábirlenýshiniń sózinshe, belgisiz adamdar qaraýsyz jaıylyp júrgen 15 bas jylqysyn alyp ketken.

Jambyl oblysy Polıtsııa departamentiniń bastyǵy Janat Súleımenovtiń aıtýynsha, atalǵan derek boıynsha Polıtsııa departamenti Krımınaldyq polıtsııa basqarmasynyń jáne Jambyl aýdandyq polıtsııa bóliminiń qyzmetkerlerinen jedel-tergeý toby quryldy.

Jedel-izdestirý is-sharalary barysynda polıtseılerdiń kásibıliginiń nátıjesinde Almaty oblysynda úsh kúdikti anyqtalyp, ustaldy. 29 jáne 28 jastaǵy eki er adam Jambyl oblysy Baızaq aýdanynyń turǵyndary, 25 jastaǵy er adam Jambyl aýdanynyń turǵyny. Olar óz kinásin moıyndady.

«Qazirgi ýaqytta sotqa deıingi tergeý amaldary júrgizilýde. Jábirlenýshige keltirilgen zalaldyń jalpy somasy toǵyz mıllıon teńgeni qurady. Polıtseıler jylqylardy Almaty oblysynda taýyp, ıesine qaıtaryp berdi. Aýyl turǵyndaryn maldaryn qaraýsyz qaldyrmaýǵa shaqyramyn. Kóbinese mal urylaryna ıesiz mal ońaı olja bolyp jatady», – dep atap ótti J. Súleımenov.