Jambyldyq turǵyn aýlasynda afrıkalyq túıequs pen taýys jáne jaıyn ósirýde
TARAZ. QazAqparat – Jambyl oblysynyń turǵyny Nurǵısa men Nurbol Qýanyshbaevtar aýlasynda afrıkalyq túıequstardy asyrap otyr. Sonymen qatar, úılerinde álemdegi eń ádemi qus taýys pen Afrıkanyń alyp balyqtarynyń biri jaıyndy da ósirýde,-dep habarlaıdy QazAqparat tilshisi.
Jambyl aýdany Shaıqoryq aýylynda turatyn aǵaıyndy Nurǵısa men Nurbol Qýanyshbaevtardyń aýlasyna kirseńiz Afrıka savannalarynda júrgendeı sezinesiz. Aýyl turǵyndary aýlasyn zoobaqqa aınaldyrǵandaı. Óıtkeni, esik aldynda boıy eki metrlik túıequstar jersinip úlgergen desek qatelespeımiz.
Olar bul túıequstardy 3 aılyǵynda Almaty arqyly Afrıkadan aldyrǵan. Aǵaıyndy qos jigit mundaı alyp qustardy aýyl turmaq, aımaq boıynsha alǵash asyraýshylar sanalady.
«Túıequstardy bizdiń óńirde kóp adam asyraı bermeıdi. Osyny alyp kórsek pa degen maqsatta asyrap jatyrmyz. Kúnine 10-15 keli tamaq tutynady. Bir sıyrdyń jem-shóbin jep qoıady. Biraq, sıyrdyń etine qaraǵanda eti qymbat. Túıetaýyqtyń eti Almatyda kelisi 7-8 myń teńge. Bulardyń bireýi 3-4 jylda 150 kg et beredi. 3 jyldan keıin 10-15 jumyrtqadan berip bastaıdy, jyl saıyn kóbeıte beredi»,- deıdi Nurǵısa Qýanyshbaev.
Sondaı-aq, onyń aıtýynsha, búginde salmaǵy 70 kelige jetken alyp qustar asa bir qamqorlyqty qajet etpeıdi eken. Aýmaǵy shaǵyn, ashyq alańqaıda júre beredi. Kún kózi kúrt sýysa da tez tońa qoımaıdy. Bir qyzyǵy bulardyń atalyǵy men analyǵyn ajyratý múmkin emes. Ony bilý úshin taǵy 1 jyl kerek kórinedi.
Aıta keteıik, Nurǵısa men Nurbol qaraqurlyqtyń qustarymen qosa álemdegi eń ádemi qus Úndistan taýysyn da asyraıdy.
«Endi bul bizdiń armanymyz bolǵandyqtan armanymyzǵa jetip otyrmyz. Hobbıimiz desek te bolady. Bul qustarmen biz paıda kórýdi maqsat tutpaımyz. Keleshekte Úkimetten kómek bop jatsa nur ústine nur bolar edi. Basqa da qustar alyp kelsek dep otyrmyz»,- deıdi Nurbol Qýanyshbaı.
Ol ǵana emes, Qýanyshbaevtardyń qoldan jasalǵan basseınderinde Afrıkanyń jaıyndary da bar. Kópshilik tek kógildir ekrannan ǵana kóretin jaıyndardyń uzyn-sany 70-ten asady. Qazir salmaǵy 2 keli bolatyn analyq jaıyndar toǵanǵa jiberilgen. Olar keıin 20-30 kelige jetetin kórinedi.
Osyndaı erekshe bastamany qolǵa alǵan aǵaıyndy aýyldyqtar aldaǵy ýaqytta aýyldaǵy aýlasyn afrıkalyq zoobaqqa aınaldyrýǵa nıetti.
