Jambyldyq tártip saqshylary arasyndaǵy atyshýly janjalǵa qatysty sot otyrysy bastaldy
TARAZ. QazAqparat - Jambyl oblysynyń mamandandyrylǵan aýdanaralyq sotynda Jambyl oblysy ІІD basqarma basshylarynyń arasyndaǵy atyshýly janjaldyń sot protsesi bastaldy, dep habarlaıdy «QazAqparat» HAA tilshisi quqyq qorǵaý vedomstvosyna silteme jasap.
Aıta keteıik, tamyzdyń 9-nan 10-na qaraǵan túni jambyldyq polıtsııa qyzmetkerleri Taraz qalasyndaǵy meıramhanalardyń birine barǵan. Ústel basynda-aq ekstremızmge qarsy is-qımyl jónindegi basqarma basshysy Murat Úmbetalıev, krımınaldy polıtsııa basqarmasynyń basshysy Erlan Bekturǵanov jáne burynǵy polıtsııa qyzmetkeri, qazirgi ýaqytta Baızaq aýdanyndaǵy HQKO-yn basqaryp otyrǵan Marsel Jetpisbaevtyń arasynda janjal týyndaǵan.
Bul oqıǵa «Araı-Plaza» meıramhanasyna ornatylǵan baqylaý kamerasyna túsip qalǵan. Beınekóriniste Bekturǵanov pen Jetpisbaevtyń Úmbetalıevke jabylǵany, al onyń pyshaq shyǵaryp shabýyldaýshylardy jaraqattaǵany kórsetilgen.
Osydan keıin M.Jetpisbaev aýyr jaǵdaıda aýrýhananyń jansaqtaý bólimine tústi, E.Bekturǵanov ýaqytsha ustaý oqshaýlaǵyshyna qamaýǵa alynyp, M.Úmbetalıevke izdeý jarııalandy. Qylmystyq iske qatysty eki polıtsııa qyzmetkeri ishki ister organyndaǵy qyzmetinen bosatylyp, dárejelerinen aıyryldy.
Bolǵan oqıǵaǵa baılanysty Jambyl oblystyq ІІD-iniń basshylyǵy men 132 qyzmetkeri de jaýapqa tartyldy. 10 kún ótkennen keıin kinásin moıyndaǵan M.Úmbetalıev tabyldy. Oǵan QR QK-iniń 24-babynda kózdelgen «Qylmysqa daıyndalý jáne qylmysqa oqtalý» áreketi boıynsha 6 jyldan 15 jylǵa deıin bas bostandyǵynan aıyrý jazasy qarastyrylyp jatyr.
Tergeý sharalarryn QR bas prokýratýrasynyń jedel-tergeý toby júrgizdi. Buǵanǵa deıingi sot otyrysy 9 qarashada bolǵan. Sot talqylaýynyń birinshi kúninde sot jábirlenýshi jaqty tyńdady.
