Jambyldyq stýdentter arasynda ulttyq oıyndardan jarys ótti

ASTANA. QazAqparat - Ulystyń uly kúni Naýryz merekesi qarsańynda Taraz memlekettik pedagogıkalyq ınstıtýtynyń stýdentteri arasynda ulttyq oıyndardan baıqaý ótti, dep habarlaıdy QazAqparat oqý ornynyń Aqparattyq-ımıdjdik qyzmetine silteme jasap.

Sharaǵa qatysýshylar «Ónerliniń órisi keń», «As adamnyń arqaýy», «Bilekti birdi jyǵady, bilimdi myńdy jyǵady» jáne «Shynyqsań shymyr bolasyń» atty kezeńder boıynsha baqtary men baptaryn synady.

Komandalar ulttyq oıyn túrlerinen básekege túsip ózara myqtyny anyqtap qana qoımaı, túrli baǵyttaǵy suraqtarǵa múmkindiginshe jaýap berdi. Qazaq halqynyń salt-dástúrlerinen syr shertetin qoıylymdar qoıyp, ulttyq taǵamdardy jeýden jarysty.

«Babalar jolymen bastalar jańa kún» baıqaýynyń maqsaty Ulystyń uly kúnin atap ótý arqyly dástúrli rýhanı qundylyqtarymyzdy keńinen nasıhattaý, ata-baba saltyn ardaqtaı otyryp, ult mártebesin kóterý.

Tartysty ótken jarys qorytyndysy boıynsha jeńimpaz atanǵan komandalar men belsendi oıynshylar arnaıy nomınatsııalar boıynsha marapattalyp, olarǵa dıplomdar men baǵaly syılyqtar tabystaldy.

Shara sońynda oqý ornynyń kórkemónerpazdary ásem ánnen shashý shashyp, myń burala bı bılep, Ulystyń uly kúnin toılaǵan jurtshylyqqa merekelik kóńil-kúı syılady.