Jambyldyq sportshy parataekvondo boıynsha eki dúrkin álem chempıony atandy
TARAZ. QazAqparat - Londonda ótken parataekvondodan álem chempıonatynda jeńiske jetken jambyldyq Ómiráli Nyshandy jerlesteri saltanatpen qarsy aldy, dep habarlaıdy QazAqparat tilshisi.
Oblystyq dene tárbıesi jáne sport basqarmasynyń habarlaýynsha, parataekvondo boıynsha Ulybrıtanııa astanasynda ótken VII álem chempıonatyna álemniń 57 elinen fızıkalyq múmkindikteri shekteýli 270 sportshy qatysqan. Qazaqstannyń atynan Taraz, Atyraý, Aqtóbe jáne Oral qalalarynan tórt sportshy qatysqan.
Múmkindigi shekteýli jandarǵa arnalǵan oblystyq sport klýbynyń sportshysy, Qazaqstan Respýblıkasynyń halyqaralyq dárejedegi sport sheberi, Ulttyq qurama komandanyń múshesi Ómiráli Nyshan +75 keli salmaq dárejesinde saıysqa túsken. K42 tobynda Ómiráli ırandyq Narıman Ahmadty 17-15 esebimen jeńgen. Aqtyq saıysta 23-11 esebimen túrkııalyq Kogbaba ıAsar Samınnen basym túsken.
Osylaısha, QR eńbek sińirgen bapkerler Almaz Ábdiqaıyrov pen Nurjan Esilbaevtyń shákirti Ómiráli Nyshan parataekvondo boıynsha eki dúrkin álem chempıony atandy.
Sporttyq mekeme maǵlumattaryna sáıkes, Nyshan Ómiráliniń jáne atyraýlyq Dombaı Nurlannyń altyn medaldariniń arqasynda Qazaqstan Respýblıkasynyń qurama komandasy jalpykomandalyq esepte úshinshi oryn alǵan.
Jambyl oblysynyń 23 jastaǵy týmasy Ómiráli Nyshan alty jasynan beri sportpen shuǵyldanady. 2014 jyly múgedek sportshylar arasyndaǵy parataekvondodan Eýropanyń V ashyq chempıonatynda +75 keli salmaq dárejesinde jeńiske jetken.
2015 jyly Sochı (Reseı) qalasynyń Olımpıada parkinde búkilálemdik IWAS oıyndarynda múgedek sportshylar arasyndaǵy parataekvondodan Ómiráli Nyshan +75 keli salmaq sanatynda jeńimpaz atandy. 2016 jyly Reseıdiń Ekaterınbýrg qalasynda ótken halyqaralyq «Krıstall» Kýbogy týrnırinde +75 keli salmaq dárejesinde jeńiske jetken.
