Jambyldyq sharýalarǵa jańa tehnıkalar berildi
TARAZ. QazAqparat – Jambyl oblysynyń sharýalary sýarmaly eginshilikti keńeıtý úshin ozyq sýarý júıelerin engizýde, dep habarlaıdy QazAqparat tilshisi.
Jambyl oblysynyń ákimi Berdibek Saparbaevtyń qatysýymen 10 sharýa qojalyǵyna 11 jańbyrlatyp sýarý qondyrǵysy berildi. Bul tehnıkalar aýylsharýashylyq qurylymdarynyń ónimdiligin arttyra túspek. Joba «SPK-Taraz» AQ arqyly júzege asqan. Kompanııa basshysy Oljas Qarjaýov fermerler jańbyrlatyp sýarý qondyrǵylaryn óte tıimdi sharttarmen satyp alatynyn aıtty, óıtkeni memleket tarapynan sýbsıdııa qarastyrylǵan. Sýbsıdııa mólsheri jabdyq qunynyń jartysyna teń. Qalǵan somany nesıege bes paıyzben alýǵa bolady.
«Aýyl sharýashylyǵy basqarmasyna sý resýrstaryn zerdeleý tapsyryldy. Sonda ár aýdandadaǵy egis alqaptaryna qatysty naqty málimetterdi jınaqtaı alamyz. Bizdiń mindetimiz – sýarmaly jerlerdiń aýmaǵyn ulǵaıtý, ylǵal únemdeý tehnologııalaryn belsendi engizý. Memleket sharýalarǵa sýbsıdııalar men qolaıly nesıelik jaǵdaılar usynýda. Biz osy múmkindikti tıimdi paıdalanýymyz kerek», - dedi oblys ákimi Berdibek Saparbaev.
Ol sharýa qojalyqtarynyń basshylaryn jańa tehnologııalardy engizýge, alynǵan ónimderdi áleýmettik pavılondarǵa jetkizip otyrýǵa shaqyrdy.
«Sharýalardan jalpy 80 ótinish kelip tústi. Olardyń barlyǵy óz kezeginde jańa qondyrǵylarǵa ıe bolady. Kelesi jyly jańbyrlatyp sýarý tehnıkalarynyń sanyn 200-ge jetkizýdi josparlap otyrmyz. Bul mashınalardyń bireýi 20 gektar jerdi sýarýǵa qaýqarly. Quny 5,1-6 mıllıon teńgeniń aralyǵynda», - deıdi Oljas Qarjaýov.
Mamandardyń aıtýy boıynsha jańbyrlatyp sýarýda ylǵal uzaqqa sozylady. Júıe tez bólshekteledi. Taǵy bir artyqshylyǵy - bul qurylǵy jyljymaly.
«Aqbıdaı-2» sharýa qojalyǵynyń basshysy Narıman Qalqabaev osyndaı mashınany alǵashqylardyń biri bolyp ıemdendi. Onyń aıtýynsha, bul jabdyqpen sýarý kezinde qol eńbegi onsha qajet emes. Sonymen qatar, ol ónimdilikti arttyrýǵa jáne ýaqytty únemdeýge múmkindik beretindigin alǵa tartty.
«Biz 38 gektar jerde kókónister men jemister ósiremiz. Jańbyrlatyp sýarý tehnıkasy arqasynda sýarmaly jer kólemin ulǵaıtýǵa múmkindik týdy. Tipti, shaǵyn sharýa qojalyqtarynyń da mundaı paıdaly apparatty satyp ala alatynyna qýanyshtymyn», - deıdi ol.
Jambyl oblysy tamshylatyp sýarý ádisin qoldanýda kóshbasshylardyń biri ekenin, ol 23 myń gektar aýmaqqa engizilgenin atap ótken jón. Bıyl ylǵal únemdeý tehnologııalaryn qoldanatyn jer kólemi 20 myń gektardan 30 myń gektarǵa ulǵaıdy. 2022 jyly bul kórsetkishti 50 myń gektarǵa deıin nemese jalpy sýarmaly jerdiń 40 paıyzyna deıin jetkizý josparlanyp otyr.
