Jambyldyq shabandoz Atyraý oblysyndaǵy báıgeden eki kólik utyp aldy
Qyzylqoǵa aýdanynda alǵash ret «Qazaqstannyń qoltýma Altyn taıy – 2022» jáne «Qazaqstannyń qoltýma Altyn qunany – 2022» at báıgesi ótti. Elimizdiń segiz oblysynan qatysqan atbegiler 70-ke jýyq taı men qunandy báıgege qosty.
Qyzylqoǵa aýdany ákimdiginiń baspasóz qyzmetinen málim etkendeı, taı báıgege 32 júırik 6 shaqyrymdyq qashyqtyqqa shapty. Máre syzyǵyn júırikterdiń arasynan Jambyl oblysynyń Qordaı aýdanynan kelgen atbegi Aıdar Nurmaǵambetovtiń «Sakýra» atty sáıgúligi birinshi bolyp kesti. Júıriktiń ıesine «Qazaqstannyń Altyn taıy – 2022» ataǵy men avtokólik kilti tapsyryldy. Al, ekinshi kelgen júıriktiń ıesi Abaı oblysynyń atbegisi Dana Álıjanǵa - 2 mln teńge, úshinshi oryn alǵan «Hanshaıym» atalatyn taıdy báıgege qosqan qordaılyq (Jambyl oblysy) Erlan Báıseýov 1 mln teńge ıelendi.
Qunan báıgeniń qashyqtyǵy – 12 shaqyrym. Atbegiler bul báıgege 27 qunandy qosty. Onyń arasynan márege «Qamal» atty júırik oq boıy ozyp keldi. Bul júırikti de Jambyl oblysynyń Qordaı aýdanynda turatyn atbegi Aıdar Nurmaǵambetov qosqan. Onyń úmiti aqtalyp, «Qazaqstannyń Altyn qunany – 2022» báıgesiniń birinshi júldesine tigilgen kólikti utyp aldy. Sóıtip, bul atbeginiń eki sáıgúligi eki kólikti ıelendi. Eki sáıgúliktiń de shabandozy – Qabyl Aıtqabyl.
Al, ekinshi orynnyń júldesi – 2 mln teńge «Qazyna» ataýymen sáıgúlikti qosqan Erlan Báıseýovke, úshinshi júldeniń 1 mln teńgesi «Ramına» júırigi úshin Almaty oblysynyń ókili Qaıqabaı Seıitjanǵa berildi.
Eske sala ketelik, budan buryn Atyraý oblysyndaǵy at báıgesinde 13 jasar shabandoz bas júldege ıe bolǵanyn jazǵan edik.
