Jambyldyq polıtseıler kóńil kóterý oryndaryn tekserdi
TARAZ. QazAqparat - Tarazda polıtseıler kámeletke tolmaǵandar arasyndaǵy qylmystar men quqyqbuzýshylyqtardyń aldyn alý sharalaryn júrgizdi, dep habarlaıdy QazAqparat tilshisi.
«16-18 qarasha kúnderi jastar kóńil kóterý oryndarynda «Stýdent kúnin» toılap júrgende kámeletke tolmaǵandar arasyndaǵy qylmystar men quqyqbuzýshylyqtardyń aldyn alý jónindegi jyljymaly toptar reıd júrgizdi. Qaladaǵy dámhanalar, bılıard, kompıýter klýbtary jáne basqa da kóńil kóterý mekemeleri tekserildi», - dep málimdedi quqyq qorǵaý organdary.
Reıd barysynda 19 ákimshilik quqyqbuzýshylyq anyqtalyp, QR Ákimshilik quqyq buzýshylyq týraly kodeksiniń túrli baptaryna sáıkes hattamalar toltyryldy.
Quqyqbuzýshylyqtardyń kóbi (8 hattama) 442-baptyń 2-bóligimen («Kámeletke tolmaǵandardyń zańdy ókilderiniń erip júrýinsiz turǵynjaıdan tys jerde saǵat 23-ten tańǵy 6-ǵa deıin bolýy») tirkelgen.
Budan tys, jasóspirimder 434-bap («Jeke tulǵalardyń sporttyq jáne sporttyq-buqaralyq, oıyn-saýyq mádenı-buqaralyq is-sharalarda júris-turys qaǵıdalaryn buzýy»), 441-bap («Jekelegen qoǵamdyq oryndarda temeki buıymdaryn tutynýǵa tyıym salýdy buzý») boıynsha da jaýapqa tartyldy. Al 200-baptyń («Qazaqstan Respýblıkasy zańnamasynyń alkogol ónimin ótkizý jónindegi talaptaryn buzý») 3-bóligin («Meıramhanalarda, barlarda jáne dámhanalarda ótkizýdi qospaǵanda, alkogol ónimin:saǵat 23-ten kelesi kúngi saǵat 8-ge deıin; etıl spırtiniń kólemdi úlesi otyz paıyzdan asatyndaryn saǵat 21-den kelesi kúngi saǵat 12-ge deıin bólshek saýda arqyly ótkizý») buzǵan mekeme ıelerine aıyppul salynbaq.
