Jambyldyq polıtseıler demalys kúnderi quqyq buzǵan 230 jasóspirimdi anyqtady
TARAZ. QazAqparat - Jambyl oblystyq ishki ister departamenti demalys kezinde kámelettik jasqa tolmaǵandar tarapynan quqyq buzýshylyqtyń aldyn alý jáne eskertý boıynsha reıdtiń qorytyndysyn jasady, dep habarlaıdy «QazAqparat» HAA.
ІІB-nyń úsh júzge jýyq qyzmetkeri bilim basqarmasy jáne basqa memlekettik organdar ókilderimen birlesip, 21-28 naýryz aralyǵyndaǵy demalys kezinde júzden astam reıd júrgizgen.
«Jastar men jasóspirimder kóp jınalatyn oryndar tekserildi, - dedi oblystyq ІІD baspasóz qyzmetiniń basshysy Gúlsara Muhtarqulova. - Túngi ýaqytta kóńil kóterý oryndarynda zańdy ókilderinsiz júrgen, alkogoldi ishimdik ishken jasóspirimder, sondaı-aq kámeletke tolmaǵandarǵa zańsyz alkogoldik ishimdikter men temeki satý faktileri anyqtaldy» delingen baspasóz baıanynda.
Іshki ister organdaryna túrli quqyq buzýshylyqpen barlyǵy 230 jasóspirim jetkizilgen.
«Beseýi - qylmys jasaǵany úshin, tórteýi ishimdik ishkeni úshin, 192-si túngi ýaqytta eresektersiz júrgeni úshin esepke alyndy», - dep túsindirdi G.Muhtarqulova.
Quqyq qorǵaý organdarynyń deregi boıynsha, Jambyl oblysynda 642 jasóspirim esepte tur.
