Jambyldyq polıtseıler 60 jastaǵy er adamdy aman alyp qaldy
TARAZ. QazAqparat – Jańatas qalasynyń turǵyndary jambyldyq polıtseılerge kórshisin qutqarǵany úshin alǵystaryn bildirdi, dep habarlaıdy QazAqparat tilshisi.
Sarysý aýdanynyń polıtsııa bólimi jergilikti polıtsııa qyzmeti bólimshesiniń ýchaskelik polıtsııa ınspektory Abzal Asaýbaıǵa Jańatas qalasynyń shaǵyn aýdanynyń turǵyndary kómek surap júgindi. Olar 60 jastaǵy kórshisiniń birneshe kún boıy páterden shyqpaǵanyn jáne telefonyna jaýap bermegenin aıtyp alańdaǵan. Mazasyzdanǵan kórshiler ýchaskelik polıtsııa ınspektoryn shaqyrǵan.
Kórsetilgen mekenjaıǵa kelgen polıtsııa qyzmetkeri Tótenshe jaǵdaı departamentiniń qyzmetkerlerimen esikti buzyp kiredi. Olar páterdiń ishine kirgende edende es-tússiz jatqan adamdy kóredi. Ýchaskelik ınspektor jedel járdem brıgadasynyń kelýin kútpeı, er adamdy kórpege jatqyzyp, qutqarýshylardyń kómegimen óz avtokóligimen aýrýhanaǵa jetkizý úshin tómenge túsirgen» delingen oblystyq polıtsııa departamentiniń baspasóz qyzmetiniń habarlamasynda.
Bes mınýt ishinde polıtsııa qyzmetkeri zardap shekken adamdy aýrýhanaǵa jetkizip, dárigerlerdiń qolyna tapsyrdy. Qazir er adamnyń densaýlyǵyna qaýip tónip turǵan joq.
Alǵys bildirgen turǵyndar beınejazba joldap, onda Sarysý aýdany polıtsııa bóliminiń barlyq jeke quramyna, atap aıtqanda, ózderiniń ýchaskelik polıtsııa ınspektoryna kásibı atqarǵan minsiz jumysy men zor adamgershiligi úshin alǵystaryn bildirdi.
