Jambyldyq polıtseıler 15 ınternet-alaıaǵyn áshkereledi
TARAZ. QazAqparat – Jambyl oblysynda alaıaqtyq qylmysy 10,9 paıyzǵa tómendedi, dep habarlaıdy QazAqparat.
Aǵymdaǵy jyly alaıaqtyq qylmysy boıynsha 204 fakt tirkelgen desek, ótken jyldyń sáıkes kezeńindegi kórsetkish 229-dy quraǵan.
Taldaý kórsetkendeı, negizinen alaıaqtyq ınternetti qoldanýshylarǵa qatysty jasalady. Qazirgi tańda oblys tergeýshileriniń óndirisinde osy sanattaǵy 31 qylmystyq is bar. Qabyldanǵan sharalar boıynsha 15 ınternet-alaıaǵy áshkere boldy. Onyń jeteýi — basqa óńirlerdiń turǵyndary.
«Taraz qalasynyń turǵynyna qatysty kóp epızodty qylmystyq is aıyptaý aktisimen aıaqtaldy. Naqtyraq aıtar bolsaq 2018-2019 jyldar aralyǵynda ol avtomashınalaryn satýshylardy óz «qurbandaryna» aınaldyryp otyrǵan. «Kolesa» veb-saıty arqyly satýǵa qoıylǵan avtokólikterdi taýyp, olardy bólip-bólip satyp alýǵa kelisedi. Satýshynyń senimine kirip, ol bar aqshany eki-úsh aı ishinde bólip tóleıtinin aıtyp, aldyn ala tıisti qarajatty tólegendigi týraly qolhat jazdyryp alyp otyrǵan. Ol óziniń sharttyq mindettemelerin oryndamaıtynyn aldyn ala bilgen jáne qolhattardy qylmystyq jaýapkershilikten qashý ádisi retinde paıdalanǵan. Alaıda bul ádis alaıaqqa kómektesken joq, onyń zańǵa qarsy áreketterin oblystyq ІІD Krımınaldyq polıtsııa qyzmetkerleri anyqtady. Qazirgi ýaqytta ustalǵan azamat Taraz qalalyq tergeý ızolıatorynda jatyr», - deıdi PD krımınaldy polıtsııa basqarmasy bastyǵynyń orynbasary Ardaq Madımarov.
Kúdiktige qatysty QR QK 190-baby 3-bóligi boıynsha sotqa deıingi tergeý bastalǵan. Jambyl oblysynyń polıtsııa departamenti azamattarǵa koronavırýsqa baılanysty engizilgen shekteý sharalary jaǵdaıynda alaıaqtyq qaýpi týraly eskertip, saq bolýǵa shaqyrady.
