Jambyldyq polıtseı áıeldi kóligimen qaǵyp, mert qyldy
TARAZ. QazAqparat –Jambyl oblysy Shý qalasynda 25 jastaǵy polıtsııa qyzmetkeri kóligimen áıeldi qaǵyp, mert qyldy, dep habarlaıdy QazAqparat tilshisi.
Oblystyq Polıtsııa departamentiniń baspasóz qyzmetinen málim etkendeı, Shý aýdandyq polıtsııa bólimi krımınaldyq polıtsııa bólimshesiniń jedel ýákili, polıtsııa aǵa leıtenanty qarańǵy ýaqytta jaıaý júrginshilerge arnalmaǵan joldan ótpek bolǵan aýdan turǵynyn – 48 jastaǵy áıeldi avtokóligimen qaǵyp ketken. Jaıaý júrginshiniń sol ýaqytta jaqyn mańdaǵy kafeden shyqqany anyqtaldy.
«Atalǵan derek boıynsha Qazaqstan Respýblıkasy Qylmystyq kodeksiniń 345-baby 3-bóligimen sotqa deıingi tergep-tekserý bastaldy. Polıtsııa qyzmetkeri ýaqytsha ustaý ızolıatoryna qamaqqa alyndy. Qazirgi ýaqytta jan-jaqty tergep-tekserý amaldary júrgizilýde, barlyq beınebaqylaý kameralaryndaǵy jazbalar alynyp, saraptamalar kesheni taǵaıyndaldy», - delingen habarlamada.
Sonymen qatar, medıtsınalyq kýálandyrý qorytyndysyna sáıkes, 25 jastaǵy polıtseıdiń ishimdik ishpegeni jáne esirtki zattaryn tutynbaǵany anyqtaldy.
