Jambyldyq pedagogtar taý-qoryqshy rotasynyń sarbazdary týraly áńgimeledi

TARAZ. QazAqparat - Kóksaı shatqalyndaǵy oqıǵa jambyldyqtardyń ǵana emes, barlyq qazaqstandyqtardy qaıǵyrtty. Áleýmettik jeli qoldanýshylary marqumdardyń týystary men jaqyndaryna qaıǵyra otyryp kóńil aıtty. Jeksenbi kúni Tarazdyń «Atshabar» gúl baǵynda qala turǵyndary eske alý shamdaryn shaǵyp, gúl shoqtaryn qoıdy.

«QazAqparat» HAA tilshisine Jambyl oblystyq mektepten tys sharalar ortalyǵy, áleýmettik mádenı baǵdarlamalar bóliminiń meńgerýshisi Olga Saǵyndyqova 91678 áskerı bólimi taý-qoryqshylar rotasynyń áskerı qyzmetshilerimen kezdesýden alǵan áseri jaıly áńgimeledi.

«Bizdiń ortalyqta oblys pedagogtaryna jáne kýrsanttarǵa arnalǵan jattyǵýlar, sheberlik synyptary, taý týrızmi, alpınızm jáne ózge de túrli baǵyttar boıynsha trenıngter ótip turady, - deıdi O.Saǵyndyqova. - Birneshe jyldan beri bizdiń tárbıelenýshi-kýrsanttar jáne pedagogtar taýǵa shyǵyp turady, ásirese alpınızmmen aınalysýǵa bar jaǵdaı jasalǵan Kóksaı shatqalyna jıi baramyz».
 

«Alpilik» arnaıy rotasyn daıyndaý jan-jaqty túrde júrgiziledi. Jaýyngerler kez kelgen qıyndyqtaǵy taý relefin ózdiginen qıyp ótýge daǵdylanady.

«Taý-qoryqshy rotasynyń sarbazdary bizdi alyp júrdi, ózderiniń biregeı múmkindikterin kórsetti, bizdiń balalar kóptegen fotosýretter túsirdi. Jaýyngerler ırandyq, aýǵandyq sekildi túrli alpınıstik túıin jasaýdy úıretti. Men sonda komandırden, aýǵan soǵysynyń ardagerinen osynyń bárin qaıdan úırendińiz dep suradym. Bólimshe komandıri, aǵa leıtenant Bek Qambarbekov ózin jáne ózge de joldastaryn AQSh-qa arnaıy oqýǵa jibergenin aıtty. Amerıkalyqtar bizdiń jambyldyqtardyń Aýǵanstannyń taýly ólkelerindegi áskerı qımyldarǵa qatysý tájirıbesin joǵary baǵalaǵan», - dedi O.Saǵyndyqova.
 

Odan bólek, «attyly taý-qoryqshylar» ataýy da jambyldyq bólimsheniń ereksheligi bolyp tabylady.

«Biz ondaǵy attardyń jataǵan, alasa ekenine nazar aýdardyq, - dep jalǵastyrdy O.Saǵyndyqova. - dál osy attarmen taý-qoryqshy rotasynyń áskerıleri kez kelgen quzdardan ótken. Alǵashynda asyl tuqymdy, bıik, iri jylqylardy satyp alǵandaryn aıtty. Biraq, birinshi taý saparynan-aq, olardyń taýǵa jaramsyz ekeni anyqtaldy. Olardy tez arada boıy alasa attarmen almastyrǵan. Olar taýda júrýge ábden ıkemdelgen».
 

Suhbat berýshi balalar men pedagogtardyń áskerı bólimge de barǵanyn atap ótti. «Barlyq jerde minsiz tártip boldy, - deıdi ol, - minsiz jınalǵan kereýetter, tazalyq, jaılylyq, gúlder. Bizge bólim aýmaǵyn, tehnıka parkin kórsetti, hımııalyq qorǵaýdan sheberlik synyptaryn ótkizdi».
 

Qazaqstanda 2000 jyly Qyrǵyzstannyń ońtústigindegi taýly aımaqtarǵa basyp kirgen ıslam ekstremısterimen kúres tájirıbesi nazarǵa alynǵan. 2003 jyly Qazaqstan Qarýly kúshterinde Jambyl oblysynda, qazaqstandyq-qyrǵyzstandyq shekara mańynda, Talas Alataýynyń bókterinde ornalasqan 91678 bólimshesiniń  attyly taý-qoryqshylar batalony quryldy. 
Buryn habarlanǵandaı, Jambyl oblysyndaǵy Kóksaı shatqalynda ótip jatqan 91678 áskerı bólimi áskerı qyzmetshileriniń jaýyngerlik daıyndyǵy boıynsha josparly sabaǵy barysynda kútpegen jerden qar kóshkini oryn aldy. QR Qorǵanys mınıstri Sáken Jasuzaqov bastaǵan Úkimet komıssııasy juma kúni qar kóshkini saldarynan áskerı qyzmetshiler qaza tapqan Jambyl oblysyna keldi. Komıssııa músheleri oqıǵa ornynda tótenshe jaǵdaıdyń sebebin anyqtap, qaza tapqandardyń otbasyna kómek kórsetý jumystaryn uıymdastyrýmen aınalysady. Qaza tapqan áskerılerdiń otbasylaryna ótemaqy beriledi.
Bul másele QR Premer-Mınıstri Baqytjan Saǵyntaevtyń jeke baqylaýynda .
Keshe Jambyl oblysyndaǵy «Ońtústik» óńirlik qolbasshylyǵynda qaza tapqan áskerılermen qoshtasty .