Jambyldyq órt sóndirýshiler 200-ge jýyq omartany ottan aman alyp qaldy
TARAZ. QazAqparat – Jambyl oblysy Baızaq aýdanynda eki turǵyn úıdiń aýlasyn sharpyǵan tilsiz jaýdan órt sóndirýshiler 200-ge jýyq aranyń uıasyn aman alyp qaldy, dep habarlaıdy QazAqparat tilshisi.
«101» telefon nómirine Baızaq aýdany Sarykemer aýyly Aqbaev kóshesindegi turǵyn úıdiń aýlasynda shóphana órtengeni jóninde habarlama kelip túsken. Bul jaıynda TJD baspasóz qyzmeti habarlady.
Oqıǵa ornyna Baızaq aýdandyq órt sóndirý bóliminen 2 órt sóndirý avtokóligimen 5 adam jeke quram shuǵyl jóneltilip, shaqyrtý ornyna nebári 4 mınýtta jetken. Sonymen qatar atalǵan oqıǵa ornyna shuǵyl túrde Taraz qalasy №4 órt sóndirý bóliminen 2 órt sóndirý avtokóligimen 10 adam jeke quram kómekke kelip, kezekshilikke órt sóndirý qyzmetiniń qyzmetkerleri de oqıǵa ornynan tabylǵan.
Ókinishke qaraı, turǵyndardyń kesh habarlasýyna baılanysty órt sóndirýshiler kelip jetkenge deıin aýlada turǵan «Zıl 131» markaly júk kóliginiń qozǵaltqysh bóligi jáne kabınasy zaqymdalǵan. Al shóphanada jınalǵan 400 túk shóp (8 tonna), sondaı-aq 15 dana omarta (aranyń uıasy) órt saldarynan joıylǵan.
Sondaı-aq qyzyl jalyn kórshi ornalasqan turǵyn úıge de jaıylyp, aýlasyndaǵy bastyrma men dárethana órtke oranǵan. Degenmen ot jaýyngerleri tilsiz jaýmen arpalysyp, turǵyn úılerdi jáne ózge 200-ge jýyq aranyń uıasy men mal qora, taýyq qoralardy órtten aman alyp qaldy. Bir qýanarlyǵy - órtten zardap shekken eshkim joq.
Órttiń shyǵý sebebi men shyǵyny anyqtalyp jatyr. Jalyn sharpyǵan aýmaq - 200 sharshy metr. Órt saǵat 18.40-ta aýyzdyqtalyp, saǵat 19.07-de órt joıylǵan.
