Jambyldyq órender el boıynsha 7-jyl qatarynan «Eń úzdik komanda» atandy

TARAZ. QazAqparat - Jambyldyq oqýshylar Almaty qalasynda «Bóbek» Ulttyq ǵylymı-praktıkalyq, bilim berý jáne saýyqtyrý ortalyǵynda ótken jalpy bilim beretin pánder boıynsha respýblıkalyq ǵylymı jobalar baıqaýynda 7-ret qatarynan «Eń úzdik komanda» ataǵyn jeńip aldy, dep habarlaıdy QazAqparat.

QR Bilim jáne ǵylym mınıstrliginiń "Daryn" respýblıkalyq ǵylymı-praktıkalyq ortalyǵy uıymdastyrǵan dástúrli baıqaýdyń respýblıkalyq kezeńine Jambyl oblysynan 58 oqýshy qatysyp, baqtaryn synady. Respýblıkalyq konkýrstynyń bıylǵy ereksheligi - oqýshylardyń ǵylymı jobalaryn qorǵaýdyń ashyqtyǵy men aıqyndylyǵyn qamtamasyz etý maqsatynda barlyq sektsııalar onlaın-rejımde ótti.

Ǵylymı jobalar baıqaýy 4 baǵyt boıynsha júrgizildi. Baıqaý qorytyndysy boıynsha, jambyldyq 5 oqýshy altyn, 2 oqýshy kúmis jáne 17 oqýshy qola medaldi ıelenip, top jardy. Sondaı-aq, bıylǵy jyly da Jambyl oblysynyń komandasy 7 jyl qatarynan «Eń úzdik komanda-2019» ataǵyn jeńip aldy.

Aıta keteıik, atalǵan respýblıkalyq baıqaýǵa elimizdiń Astana, Almaty, Shymkent qalalary men 14 oblysynan, onyń ishinde, respýblıkalyq bilim berý uıymdary jáne Nazarbaev zııatkerlik mektepterinen 800-den asa daryndy oqýshy jalpy bilim beretin pánder boıynsha synǵa túsken bolatyn.