Jambyldyq oqýshylarǵa 24,5 myń kompıýter men noýtbýk satyp alynýda
TARAZ. QazAqparat –Jambyl oblysynda respýblıkalyq bıýdjetten qosymsha qarajat bólinip, oqýshylarǵa 24,5 myń birlik kompıýterlik tehnıka satyp alynýda. Onyń ishinde 2756 kompıýter, 20156 noýtbýk, 1541 planshet bar,- dep habarlaıdy QazAqparat tilshisi.
Kompıýterlik tehnıkalardy satyp alý, taratý jumystary QR Sybaılas jemqorlyqqa qarsy is-qımyl agenttiginiń Jambyl oblystyq departamenti janyndaǵy «Adaldyq alańy» jobalyq ofısiniń tikeleı baqylaýynda. Bul týraly oblystyq bilim basqarmasynyń baspasóz qyzmeti habarlady.
Jalpy, elimizdegi pandemııaǵa baılanysty 2020-2021 oqý jylynda oqý protsesi eki túrli formatta uıymdastyryldy. Oblystaǵy 229 mektepte 148,7 myń oqýshy qashyqtyqtan jáne epıdemıologııalyq jaǵdaı turaqty shalǵaı eldi mekenderde ornalasqan 213 mektepte 32 myń oqýshy dástúrli túrde bilim alýda.
Al, qashyqtyqtan oqytatyn 222 mekteptegi 4 385 kezekshi bastaýysh synypta 58 myń oqýshy bilim alýda.
Qashyqtyqtan oqytýdy tıimdi uıymdastyrý maqsatynda mektepterdiń teńgerimindegi 17,5 dana kompıýter az qamtamasyz etilgen jáne kóp balaly otbasynyń, jetim jáne ata-anasynyń qamqorlyǵynsyz qalǵan, erekshe bilim alýdy qajet etetin balalarǵa úlestirildi.
Sondaı-aq, oblys mektepteriniń oqýshylaryna 2030 planshet taratyldy.
Budan bólek, respýblıkalyq bıýdjetten 24,5 myń birlik kompıýterlik tehnıkany satyp alýǵa qosymsha qarajat bólindi, onyń ishinde 2756 kompıýter, 20156 noýtbýk, 1541 planshet bar. Kompıýterlik tehnıkanyń bir bóligi aǵymdaǵy jyldyń 23 qyrkúıeginde jetkiziledi dep kútilýde.
Qashyqtyqtan oqıtyn mektepterdegi az qamtamasyz etilgen jáne kópbalaly otbasynyń, jetim jáne ata-anasynyń qamqorlyǵynsyz qalǵan balalardy ınternetpen qamtamasyz etý úshin jergilikti bıýdjet esebinen satyp alynatyn 20267 roýterdiń 3437-si mektepterge jetkizildi. Bul jumystar jalǵasyn tabatyn bolady.
