Jambyldyq oqýshy shaǵyn traktor jasap aldy
TARAZ. QazAqparat – Jambyldyq jas ónertapqysh shaǵyn traktor jasap shyǵardy, dep habarlaıdy QazAqparat tilshisi.
Jambyl oblysy Sarysý aýdanynyńdaǵy Áıteke bı atyndaǵy orta mekteptiń oqýshysy shaǵyn traktor jasap shyǵardy. Saýdakent aýylynyń balasy Baqtııar Turǵanbaev shaǵyn agromashınany kúndelikti turmystyq qaldyqtan jasaǵan. Bul týraly Saýdakent aýylyndaǵy aýdandyq bilim bóliminiń tehnıkalyq shyǵarmashylyq ortalyǵynyń dırektory Muhtar Meldeev bylaı deıdi.
«Mektepterdegi «Avto-21» úıirmesine 10-11 synyptyń oqýshylary qatysady. Áıteke bı atyndaǵy mekteptiń 11 synyp oqýshysy Baqtııar «Aýyl sharýashylyq tehnıkalar men jabdyqtar salasyndaǵy tehnıkalyq qurastyrý» atalymy boıynsha «Shaǵyn traktor» taqyrybyndaǵy jumysyn sátti qorǵap shyqty. Jetekshilik etken Saparǵalı Baıýlıev izdenimpaz, ónertapqysh oqýshyǵa naqty baǵdar, baqyt berip otyrdy», - deıdi ortalyq dırektory.
Baqtııardyń ózi bul ıdeıa aýyl turmysyndaǵy kúndelikti qajettilikten de týyndaǵanyń aıtady. Aýyldy jerde úı aýlasy keń, baý-baqsha da úlken. Jerdi qolmen aýdaryp, óńdeý qıynǵa soǵady. Jas ónertapqysh jumysty jeńildetýdiń jolyn izdep, shaǵyn agromashına jasaýǵa bel býady.
«Kádimgi úlken traktordyń atqaratyn qyzmetin atqarady. Traktor qyryq túrli bólshekten qurastyryldy. Qozǵaltqysh retinde kádimgi benzınmen jumys isteıtin sýsorǵy motordy paıdalandym. Al qańqasyn úıdegi temir qaldyqtarynan jınadym. ÝAZ-dyń dóńgelegi. Aldyńǵy dóńgelek úıde jaramaı qalǵan shóp shalǵysynyki. Al, oryndyǵy «Gazeldiki». Artyna zat salynady. Tirkegishi bar. Soqa jegiledi»,- deıdi jas ónertapqysh.
Shaǵyn traktor aýyldardaǵy úlken tehnıkalar bara almaıtyn kishigirim baqtar men saıabaqtardyń ishindegi agrotehnıkalyq jumystardy júrgizýge óte qolaıly. Aryq qazyp, jer jyrtýǵa da taptyrmas tehnıka janarmaıdy da kóp qajet etpeıdi. Qazirdiń ózinde ártúrli tehnıkanyń bólshekterinen qoldan qurastyrylǵan shaǵyn traktorǵa aýdan dıqandary qyzyǵýshylyq tanytyp otyr eken.
