Jambyldyq qutqarýshylar qar qursaýynda qalǵan eki júkti áıelge kómek kórsetti
TARAZ. QazAqparat – Jambyl oblysynda qutqarýshylar qarly boranda qalǵan eki júkti áıeldi aýrýhanaǵa jetkizip, kómek kórsetken,- dep habarlaıdy QazAqparat tilshisi.
Oblystyq tótenshe jaǵdaılar departamentinen habarlanǵandaı, Jýaly aýdanynda bolǵan dúleı boran kezinde qutqarýshylar 2 júkti áıeldi aýdan ortalyǵyna jetkizgen.
Tarqatyp aıtsaq, Jýaly aýdany, Kóltoǵan aýylynan júkti áıelderdi alyp, aýdan ortalyǵyna jetkizbek bolǵan jedel járdem qyzmetiniń kóligi jol boıynda qarly boranda qalyp qoıǵan.
Oqıǵa ornyna TREKOL kóligimen jedel jetken №7 órt sóndirý bóliminiń qutqarýshylary júkti áıelderdi jáne medıtsına qyzmetkerlerin aýdan ortalyǵyna jetkizgen. Aýdandyq ortalyq aýrýhana basshylyǵy órt sóndirýshi-qutqarýshylardyń kásibı sheberlikteri jáne nátıjeli atqarǵan jumystary úshin alǵys bildirdi.
Aıta keteıik, dál sol kúni Jýaly aýdanynda qutqarýshylar 29 adamdy qar qursaýynan qutqaryp, jylytý pýnktterine jetkizgen. Sondaı-aq jolda qalǵan birneshe tehnıkany qardan súırep shyǵarý jumystaryn júrgizgen.
