Jambyldyq qurylysshylar Arystaǵy 21 úıdiń jóndeý jumystaryn aıaqtady
Bul týraly Jambyl oblysy ákiminiń keńesshisi Birjan Sóktaı óz áleýmettik jelidegi paraqshasynda jarııalap, shtabtyń jemisti jumysynan habar berdi.
«Arys qalasyna arnaıy kelip, qalany qalpyna keltirý boıynsha óńirlerdiń shtab jumystaryn kórgen QR Premer-Mınıstri Asqar Mamın Jambyl oblysynyń shtabyna da bas suqty. Shtabtyń belsendiligin, jambyldyq qurylysshylardyń jemisti jumysyn atap ótken úkimet basshysy óziniń joǵary baǵasyn berdi»,-dep atap ótti Birjan Sóktaı.
Aıta keteıik, buǵan deıin xabarlaǵanymyzdaı, Jambyl oblysyna tıesili bóliniste 11 kóshe bar. Onda 312 jeke turǵyn úı, 14 áleýmettik jáne kommertsııalyq nysan anyqtalǵan. Zerdeleýden ótken jeke turǵyn úıdiń barlyǵynyń aqaý aktileri toltyrylyp, smetasyn daıyndaý jumystary júrgizildi.
Qıraǵan 3 úıdiń ekeýi qaıta turǵyzylyp, bireýi tolyq jańǵyrtylmaq. Qajetti qurylys materıaldary kún saıyn jetkizilýde. Óz kezeginde úıleri qalpyna keltirilip, qonystaryna qaıta jaıǵasqan arystyqtardyń qýanyshynda shek joq. Olar qurylysshylarǵa óz alǵystaryn jetkizýde.
«Jambyldyqtardyń Arysqa gýmanıtarlyq kómek kórsetýi áli de jalǵasýda. Jýyrda ǵana Taraz qalasyndaǵy Kerimbaı atyndaǵy №12 mektep-gımnazııasynan Arystaǵy qurylysshylar men jergilikti turǵyndar úshin azyq-túlik jóneltildi. Demeýshilerdiń esebinen jiberilgen azyq-túliktiń ishinde kartop, sábiz, pııaz, qyryqqabat, kúrish, sıyr eti, aýyzsý, makaron, suıyq maı, alma, shujyq jáne 16 tonna un bar», -deıdi B.Sóktaı.