Jambyldyq kásiporyndar óndiris kólemin arttyrmaq
Aımaq basshysy Berdibek Saparbaevtyń Taraz qalasyndaǵy kezekti jumys sapary buǵan deıin oblys ákimdiginde ótken qurylys jumystaryn ýaqtyly jáne sapaly júrgizýge qatysty keńestiń qısyndy jalǵasy desek te bolady.
Atalǵan jıynda aımaq basshysy asfaltbeton zaýyttaryn qurýdy, bıtýmnyń qajetti mólsherin jınap, radıatorlar óndirisin ulǵaıtýdy tapsyrǵan edi. Naqty jaǵdaıdan habardar bolý úshin Berdibek Saparbaev barlyq qurylys túrlerimen aınalysatyn «AraıStroıMarket-2030» JShS-ne at basyn burdy.
Kásiporynnyń asfaltbeton zaýyty úlken jáne az qýatty eki óndiristen turady. Birinshi jaǵdaıda, saǵatyna 200 tonna, ekinshisinde - 80 tonna ónim shyǵarýǵa qaýqarly. Qurylys materıaldary óndirisi qyzý júrýde. Kásiporyn ıesi Arman Edilbaev jýyrda kirpish zaýytyn salýǵa nıetti ekendigin aıtyp, alaıda elektr qýatynyń jetispeýshiligine qatysty másele týyndap otyrǵandyǵyn jetkizdi. Bul oraıda oblys ákimi birden energetıka jáne turǵyn úı kommýnaldyq sharýashylyq basqarmasynyń basshysy Nurlan Aldamjarovqa atalǵan jaǵdaıdy jan-jaqty saralap, usynysyn bildirýdi tapsyrdy.
Kásiporynnyń syıymdylyǵy bes myń tonna bıtýmdy saqtaýǵa qaýqarly óz qoımasy bar. Búginde úsh myń tonna qurylys materıaly saqtaýly. Jaqyn ýaqytta bıtýmnyń qalǵan kólemi óndirilip, kásiporyn úshin aǵymdaǵy qurylys maýsymyna jetkilikti qor qalyptaspaq.
«AraıStroıMarket-2030» JShS kásiporyndar tobynda qýatty jylyna 250 myń danany quraıtyn ıtalıandyq quıý tehnologııasy boıynsha alıýmınıı radıatorlaryn óndirý jelisi jumys isteıdi. A.Edilbaev aldaǵy úsh aı ishinde qajetti qondyrǵyny satyp alyp, jeliniń ónimdiligin 700 myń radıatorǵa deıin arttyrýdy josparlap otyr.
Berdibek Saparbaev óz kezeginde «DAMÝ» Qory arqyly banktik nesıeniń paıyzdyq mólsherlemesin sýbsıdııalaý qyzmetin paıdalanýdy usyndy.
Keńes dáýirinen bastap «JambylHımStroı» JShS jyl saıyn 20 myń tekshe metr temir beton buıymdaryn shyǵaryp keledi desek, onyń ishinde kólemi 10 myń tonnaǵa deıingi rezervýarlar, sýarý júıelerine arnalǵan naýalar bar. Sonymen qatar, munda 40 myń tekshe metr daıyn beton ónimderi shyǵarylady. Kásiporynda 98 adam jumys isteýde, olardyń ortasha jalaqysy 160 myń teńgeni quraıdy.
Zaýyt dırektory Serik Talqanbaevtyń aıtýynsha, basty másele – tapsyrys tapshylyǵy. Eger tapsyrys bolsa ónim kólemin úsh ese arttyrýǵa bolady, ol úshin qajetti barlyq resýrstar – shıkizat, jabdyqtar men mamandar jetkilikti.
- Bıyl biz kóptegen arnalardy jóndeýdi bastaımyz, Sondyqtan tapsyrystyń artýyna óz úlesimizdi qosatyn bolamyz. Adamdar jumys isteýi kerek, al zaýyttyń salyq tóleýi mańyzdy, - dedi Berdibek Saparbaev.
«Metall qurylǵylar jáne rezervýarlar zaýyty» JShS-niń de kezdesip otyrǵan máseleleri osyǵan uqsas. Biraq tapsyrystyń joqtyǵynan bólek munda bilikti kadrlardyń jetispeýshiligi de baıqalýda.
«Bizde tájirıbe jınaqtaǵannan keıin dánekerleýshi, slesar jáne basqa da mamandar basqa kásiporyndarǵa aýysyp ketedi», - deıdi zaýyt basshysy Talas Ahmetov.
Bir jyldary munda 180 adamǵa deıin jumys istegen bolsa, qazir 110 adam eńbek etýde.
Berdibek Saparbaev kásiporyn óz qyzmetkerleri aldyndaǵy áleýmettik mindettemelerdi oryndaýdy jalǵastyratyn shartty saqtaǵan jaǵdaıda, qol ushyn beretinin basa aıtty.