Jambyldyq kásipkerler jarnamany qatesiz jasaý úshin fılologtarǵa qulaq túredi
TARAZ. QazAqparat - Taraz onomastıkalyq komıssııasy uıymdardyń attaryn, rekvızıtterin, mańdaısha jazbalardy, oblys ortalyǵyndaǵy kóshelerdiń anshlagtary men vızýaldyq aqparattardy tekserip shyqty, dep habarlaıdy «QazAqparat» HAA tilshisi.
«Onomastıka salasyndaǵy jumys ákimshilik-aýmaqtyq birlikterdiń, nysandardyń attaryn, kórneki nasıhat jáne aqparat quraldaryn retteýdi qamtıdy, - deıdi oblys ákimdiginiń tilderdi damytý jónindegi basqarmasynyń basshysy Sulýshash Qurmanbekova. - Bizdiń ádistemelik kómegimiz olardy «Tilder týraly» Zań normalaryna sáıkestendirýge, til mádenıetin kóterýge qyzmet etedi. Qalany qatege toly kórneki jarnamalardan tazartý úshin reıdter uıymdastyrylady. Memlekettik mekemelerdegi mańdaısha jazýlardyń saýatty bolýyn úzbeı baqylap otyramyz. 2016 jyly 1762 memlekettik mekemeniń 451-inde osyndaı qateler anyqtalǵan edi. Osyǵan baılanysty ákimdik mamandaryna mańdaısha jazbalardy daıyndamas buryn basqarmadan tıisti ruqsat alýdy baqylaý tapsyryldy. Qazirdiń ózinde 400-den astam mańdaısha jazbasy retteldi».
Basqarma basshysy eldi mekenderdegi kórneki vızýaldyq aqparattar (jarnamalar) da baqylaýdy ekenin aıtty.
«Saýatsyz aýdarylǵan mátinderdegi qatelermen kúreskennen góri olardyń aldyn alǵan áldeqaıda tıimdi. Sondyqtan basqarmada «Jedel jeli» qyzmeti uıymdastyryldy. Ol arqyly kásipkerler kórneki jarnamalar jóninde tegin keńester alýyna bolady. Qazirdiń ózinde saýatty aýdarýdy qajetsinetin 120-dan astam mátin keldi. Oblystaǵy bıznes-qurylymdar ókilderiniń arasynda «Saýatty jarnama - qala kórki» aktsııasy ótkizilip, onyń aıasynda saýda oryndary men kásipkerlik sýbektileriniń kórneki jarnamalarynda 176 zań buzýshylyq faktisi anyqtaldy. Olardyń ıelerine «Tilder týraly» jáne «Jarnama týraly» zańdardyń talaptaryn oryndaý qajettigi túsindirildi. Ótken jyly 2 357 nysannyń ıelerimen túsindirý jumystary júrgizilip, 772 nysanda qateler anyqtalǵan bolatyn. Sol qatelerdiń 583-i durystalǵan», - deıdi Sulýshash Qurmanbekova.
Basqarma basshysy zańnama talaptaryn buzýshylyqtardyń arasynda tek bir ǵana tildegi ataýlardyń, aýdarmalardyń qate ekenin, pýnktýatsııalyq, orfografııalyq qatelerdi, áripterdiń túsip qalatynyn, sondaı-aq estetıkalyq talǵamǵa saı kelmeıtin jarnamalardyń órip júrgenin aıtty. «Tilder týraly» Zańnyń normalaryn buzǵandarǵa aldymen eskertý jasalady. Eger osy qateler bir jyldyń ishinde qaıta jasalsa, shaǵyn kásipkerler men kommertsııalyq emes uıymdarǵa 10AEK, orta kásipkerlik sýbektilerine 20 AEK, al iri kásipkerlik sýbektilerine 50 AEK mólsherinde aıyppul salynady», - deıdi ol.
