Jambyldyq kásipkerler túrmede óndiris oryndaryn ashpaq
TARAZ. QazAqparat - Jambyl oblystyq prokýratýrasynda bıznes ókilderine óńirdegi óndiris oryndarynyń qýaty kórsetildi, dep habarlaıdy QazAqparat tilshisi vedomstvonyń baspasóz qyzmetine silteme jasap.
Shara Jambyl oblystyq prokýratýrasynyń bastamasymen, oblys ákimdigi men oblystyq Kásipkerler palatasynyń qoldaýymen uıymdastyryldy.
20-dan astam bıznesmen oblysta jolǵa qoıylǵan óndiris túrlerimen tanysty. Prokýratýra qyzmetkerleri nysandar týraly áńgimeleıtin vıdeony kórsetip, olardy alýdyń tártibin túsindirdi.
Sharany uıymdastyrýdaǵy basty maqsat - sottalǵandar úshin qosymsha jumys oryndaryn ashý. Búgingi tańda oblystaǵy túzetý mekemelerinde jazasyn ótep júrgenderdiń 71%-ǵa jýyǵy eńbekpen qamtylǵan. Atap aıtqanda, bódene ósirýge mamandanǵan «Shýkýrov» jeke kásipornynda 12 adam jumysbasty bolsa, «Yrysty» JK-da jeti adam kıiz úı toqýmen aınalysyp otyr.
Shara qorytyndylary boıynsha, 10-ǵa jýyq kásipker túrmede óndiris ornyn ashýǵa qyzyǵýshylyq tanytty.
