Jambyldyq eriktiler 10 myń maskany tegin taratty
TARAZ. QazAqparat – Jambyl oblysynyń volonterleri COVID-19 pandemııasyna baılanysty elimizde tótenshe jaǵdaı rejımi jarııalanǵannan bastap, kún saıyn barlyq qala men aýdan turǵyndaryna túsindirý jumystaryn júrgizýde, dep habarlaıdy QazAqparat.
Oblys ákimdiginiń jastar saıasaty máseleleri basqarmasynyń basshysy Serikbol Berikqojanyń aıtýynsha, óńir volonterleri óz qolymen tikken 10 myń dana medıtsınalyq betperdeni qala tazalyǵyna jaýapty jumysshylar men turǵyndarǵa taratty.
«Jambyldyq eriktiler osy ýaqytqa deıin 30 myń únqaǵaz, búktemeler men medıtsınalyq maskalar taratyp, 15 reıd uıymdastyrdy. Sonymen qatar áleýmettik az qamtylǵan, kópbalaly jáne jalǵyz ilikti qarııalarǵa «Biz birgemiz« uranymen birinshi kezektegi qajetti 700 dana azyq-túlikter men gıgıenalyq zattar salynǵan qoraptar úlestirdi», - dedi basqarma basshysy.
Sondaı-aq, ol oblys ákimdiginiń jastar saıasaty máseleleri basqarmasy «Qoǵamdyq saqshy» jobasyn jyl basynan beri júzege asyryp kele jatqandaryn jetkizdi. Oǵan «Jibek joly», «Aq suńqar», «Temirqazyq» volonterlik qozǵalystary men óńirdegi «Jas Otan» Jastar qanaty, «Qazaqstan stýdentter Alıansy» jáne «Jas sarbaz» áskerı-patrıottyq jastar uıymynyń eriktileri tartylǵan.
Atalǵan joba aıasynda volonterler mereke kúnderi qadaǵalaý sharalaryna atsalysýda. Naqtyraq aıtsaq, saıabaqtarda, kóshelerde, móltek aýdandarda túsindirý jumystaryn júrgizgen. Meıramhanalar, oıyn-saýyq ortalyqtary, kafeler men ashanalardyń 22.00-den keıin jabyq bolýyn polıtsııa departamenti qyzmetkerlerimen birlese qadaǵalap, arnaıy reıdtik jumystarǵa jumyldyrylýda.
