Jambyldyq ekologtar 800-ge jýyq avtobýs júrgizýshisin jazaǵa tartty
TARAZ. QazAqparat - Tarazda qoǵamdyq kólikter shyǵaratyn gazben aýanyń lastanýyna baılanysty týyndaǵan ekologııalyq problemany sheshý mindeti alǵa qoıyldy, dep habarlaıdy QazAqparat tilshisi.
Jambyl oblysy ІІD baspasóz qyzmetiniń málimetinshe, shilde-tamyz aılarynda oblystyq ortalyqtyń ishki ister basqarmasy Jambyl oblysy ekologııa departamentiniń zerthanalyq-analıtıkalyq baqylaý bólimi mamandarynyń qatysýymen Tarazda «Taza aýa» aılyǵyn ótkizgen.
«Búginde atmosferalyq aýanyń avtokóliktermen lastanýy Tarazdaǵy ózekti máselelerdiń biri bolyp qala beredi. Tabıǵatty qorǵaý zańnamasyn oryndaý maqsatynda jáne ekologııalyq qaýipsizdikti qamtamasyz etý úshin ІІB Jergilikti polıtsııa qyzmeti gaz jáne tútinniń quramynda mólsherinen tys lastaýshy zattary bar kólikterdi qoldanatyn júrgizýshilerdi anyqtaý úshin birqatar sharalar uıymdastyrdy», - dedi quqyq qorǵaý vedomstvosynda.
Osy ýaqyt aralyǵynda QR ÁQBtK 334-babyna sáıkes talaptardy buzǵan azamattarǵa qatysty 183 ákimshilik hattama taǵaıyndaldy.
2018 jyldyń basynan beri qoǵamdyq kólikterdiń 797 júrgizýshisine qatysty ákimshilik materıaldar toltyrylǵan.
Ekologtardyń paıymdaýynsha, ótken jyly oblys ortalyǵy boıynsha bólingen gazdyń kólemi 130 myń tonnany quraǵan. Mundaı lastaýshy quraldardyń negizgisi - qoǵamdyq kólikter. Tasymaldaýshy kompanııalar ekologııalyq normalardy saqtamaıdy, al qalalyq avtobýstar tehnıkalyq tekseristen resmı túrde ǵana ótkendeı bolady, sondyqtan Taraz kóshelerinen artynan qara tútin ergen avtobýstardy jıi kórýge bolady. Polıtsııa ókilderi bul másele sheshimin tabady dep ýáde berdi.
