Jambyldyq dárigerlerge 18 reanımobıl men 8 «jyljymaly medıtsınalyq keshen» berildi
TARAZ. QazAqparat – Jambyl oblysynda densaýlyq saqtaý mekemeleriniń materıaldyq-tehnıkalyq bazasy jańartylýda, dep habarlaıdy QazAqparat tilshisi.
Búgin saltanatty jaǵdaıda aımaq basshysy Berdibek Saparbaev medıtsına qyzmetkerlerine zamanaýı jabdyqtarmen jabdyqtalǵan jańa avtokólikterdiń kiltterin tabystady.
Otandyq óndiristerde jabdyqtalǵan jyljymaly medıtsınalyq dıagnostıkalyq keshender segiz aýdandyq aýrýhananyń balansyna berildi. Sondaı-aq, oblystyq jedel járdem stantsııasynyń parki «Hyundai» markaly 18 reanımobılmen tolyqty.
«Memleket basshysynyń negizgi saıasatynyń basym baǵyttarynyń biri – Densaýlyq saqtaý salasyn jańǵyrtý. Barlyq resýrstar qazaqstandyqtardyń ómiri men densaýlyǵyn qorǵaýǵa baǵyttalýy kerek. Medıtsınalyq uıymdar qajetti qural-jabdyqtarmen qamtamasyz etilip, tósek qory men ınfraqurylymy jańartylýda. Dárigerlerdiń jalaqysy kóterilýde. Bizdiń oblysta densaýlyq saqtaý salasyna shamamen 5 mıllıard teńge ınvestıtsııa salyndy. Qazirgi tańda koronavırýstyń yqtımal ekinshi tolqynyna qyzý daıyndyq júrýde. Atap aıtsaq, eki aılyq dári-dármek qory qalyptasyp, 2530 tósek-oryn daıyndaldy, jabdyqtar satyp alynýda. Asfendııarov atyndaǵy Ulttyq medıtsınalyq ýnıversıtetimen birlesip kadrlardy daıarlaý boıynsha isi qolǵa alynyp jatyr», - degen Berdibek Saparbaev medıtsına qyzmetkerlerine janqııarlyq eńbekteri úshin alǵys bildirip.
Ol jańa tehnologııa dárigerlerdiń naýqastarǵa jetýin tezdetip, medıtsınalyq kómektiń sapasyn arttyratynyna senim bildirdi.
Medıtsınalyq jyljymaly keshender jalpy qabyldaý bólmeleri, akýsher-gınekolog, sáýlelik dıagnostıka, jalpy tájirıbelik dáriger alańdary, taldaýlar qabyldaý orny, dárihana pýnkti, saraptamalyq klastaǵy portatıvti ÝDZ, aınalasyna qaýipsiz rentgen jáne flıýorografııamen qamtylǵan. Múmkindigi shekteýli jandarǵa arnalǵan pandýs-lıfti bar.
Densaýlyq saqtaý basqarmasynyń basshysy Áset Qalıev buǵan deıin oblystyń úsh aýdany jyljymaly medıtsınalyq dıagnostıkalyq keshenge ıe bolǵanyn atap ótti. Al, búgingi keshender qalǵan aýdandyq aýrýhanalarǵa jetkiziledi. Osylaısha, barlyq on aýdan jáne oblys ortalyǵy jyljymaly keshendermen qamtamasyz etilip otyr.
«Taǵy 48 jedel járdem kóligi satyp alynady. Jedel járdem men jyljymaly medıtsınalyq keshender dárigerlerdiń shalǵaıdaǵy aýyldarǵa jetýine kómektesedi»,- dedi Áset Qalıev.
Saltanatty shara barysynda 12 jambyldyq densaýlyq saqtaý qyzmetkeri «Halyq alǵysy» medalimen marapattaldy.
Óz kezeginde medıtsına qyzmetkerleri de jan-jaqty qoldaýlarǵa rızashylyqtaryn bildirdi. Dárigerler osyndaı keshenderdiń arqasynda aýyl turǵyndaryna sapaly kómek kórsete alatyndyqtaryn, bul oblys turǵyndarynyń densaýlyǵyn jaqsartýǵa yqpal etetindigin atap ótti.
